Shillong, Jylliew 18
Sa shisien ka ïingbishar Meghalaya High Court ka la shah byrngem pynbthei bom lyngba ka shithi kaba la phah sha kane ka ïingbishar da ka email ha ka Sngi Ba-ar.
Kane ka dei ka sien ba ar naba kum kane ka jingbyrngem ka la mih pyrshah ïa ki bor pynïaid ka Meghalaya High Court. Lah ban pynkynmaw ba ha ka 6 tarik Kyllalyngkot mynta u snem lyngba ka ’email’ ba la phah, la maham ba lah ban don ka jingbthei bom hapoh ka phyllaw jong kane ka ïingbishar.
Ha kaba ïadei bad kane ka jingshah byrngem, na ka liang ki pulit ki la pynjur bad pyrkhing bha ïa ka jingpahara ha sawdong jong kane ka ïingbishar.
Halor kane ka jingshah byrngem, la pynthikna ruh da ka tyllong khubor na ki pulit bad ha kaba ki la pynjur ka jingpahara ha phyllaw jong katei ka ïingbishar.
Hadien ka jingïoh pdiang ïa ka email, ki pulit pynlip bom (bomb squad) ryngkat bad ka kynhun K-9 units, ki la leit bran-bran sha phyllaw jong ka ïingbishar Meghalaya High Court, hynrei ym shym la lap bom. Na ka liang jong ki pulit mynta ki dang pynlong ka jingtohkit ïa kane ka ’email’ ban lap ïa ka thymmei naei ka wan.
