Shillong, Jylliew 18
Haduh 42 tylli ki shnong na ki hynriew tylli ki district jong ka Meghalaya ki la shah ktah bad haduh 17 tylli ki jingtei kiba la shah pynjulor nalor 2 tylli ki mynsiem briew kiba la duh noh, na ka jingther jong u ‘lapbah ba jur.
Katkum ka jingkheiñ ba la ai da ka Meghalaya State Disaster Management Authority (MSDMA), la ong ba kitei ki jingshah ktah jong ki shnong, ki jingshah pynjulor jong ki jingtei bad ka jingduh ïa ki mynsiem briew nalor ka jingshah pynjulor jong ki jingthung jingtep kaba la kot sha ka 4.45 hectare ki dei kiba la jia hapdeng ka 10 tarik Jylliew, 2024 haduh ka por 11 baje mynstep jong ka 18 tarik mynta u bnai.
Ki ar tylli ki mynsiem briew kiba la duh noh na ka jinglynshop jong ka bor mariang ki long u Bah Probino Warbah, 48 snem na shnong Tynring ha East Khasi Hills, uba la ngam jyllop ha ka wah Umrynjah kaba hap hapoh ka Mawlai C&RD Block ha ka 7 tarik mynta u bnai bad ïa ka met la ïoh ban sei haduh ka 10 tarik.
Kawei pat ka dei jong u Bah Kantly Maram uba la 49 snem na ka shnong Nongkroh Rambrai ba hap hapoh ka Nongstoiñ Block ha West Khasi Hills, uba la khlad noh ha ka 12 tarik mynta u bnai na ka jingshah pom pyrthat.
Napdeng ki hynriew tylli ki district, ka West Garo Hills ka dei ka district kaba la shah ktah jur bha, ha kaba ki shnong kiba la shah ktah ki long haduh 24 tylli kynthup ruh haduh 2825 ngut ki briew.
Tang ha West Garo Hills haduh 15 tylli ki jingtei ka Sorkar ki la shah pynjulor katba ki ïing pat kiba la shah pynjulor ki long tang 2 tylli.
Katba ha East Khasi Hills ka jingshah ktah jong ki shnong ka la long tang kawei. Ha East Jaiñtia Hills ruh tang kawei ka shnong ka la shah ktah jur bad haduh 107 ngut ki briew ki la shah ktah ha kane ka district bad ka jingshah pynjulor jong ki jingthung jingtep ka long haduh 3.45 hectare.
Haba phai pat ha Eastern West Khasi Hills, ki la don ar tylli ki shnong kiba la shah ktah bad 3 tylli ki ïing kiba la shah pynjulor bad ktah ruh ïa 5 ngut ki briew. Ha South West Khasi Hills pat ki la don haduh 11 tylli ki shnong kiba la shah ktah bad ruh ka jingjulor jong 13 tylli ki ïing. Ha kane ka district ki la don ruh ar tylli ki jingtei kiba la shah pynjulor bad haduh 1 hectare ka jaka rep ka la shah pynjulor.
Ha West Khasi Hills pat ki la don tang lai tylli ki shnong kiba la shah ktah bad haduh 11 ngut ki briew kila shah ktah.
Ka MSDMA ka pyntip ba ki jingtwa khyndew bad jingpoi umsaw ki wah, ki la jia tang hapoh ka West Jaiñtia Hills bad South Garo Hills bad ka jinglum jingkheiñ ïa ki jingpynjulor ka dang ïaid shakhmat.
