Shillong, Jylliew 18
Uwei u heh pulit IPS ka jylla Assam ïa uba la tip kyrteng kum u Siladitya Chetia u la siat ïap ïalade da ka pistol ha ka Sngi Ba-Ar ha Guwahati mar ïa ïoh jingtip ba ka kurim jong u kam don shuh ha kane ka sla pyrthei hadien ba ka la shah sumar na ka jingpang bampong mynta la katto katne por.
U Chetia u dei u IPS jong u snem 2009 bad u ju bat ïa ka kam Secretary ka tnat pohïing ka sorkar Assam.
Ki khubor na Assam ki ïathuh ba u Chetia u la siat ïap ïalade ha ka kamra Intensive Care Unit (ICU) kaba don ha kawei ka hospital shimet ba ka kurim jong u ka la khlad.
Ïa kane ka jingkhlad noh jong utei u heh pulit la pyntip ruh da u Director-General of Police (DGP) ka Assam, u GP Singh, IPS, mynta ka janmiet.
U Singh u la ong ba u Chetia u la pynïap ïalade tang hadien katto katne por ba u doktor u la ai ïa ka khubor ba ka kurim jong u kam don shuh. U Singh u la ong ba ka kurim jong u Chetia ka la don hapdeng ka jingshitom bampong la katto katne por.
Ki khubor ki ïathuh ruh ba ka kurim jong utei u heh pulit ka la don hapdeng ka jingshah sumar ha katei ka hospital shimet la bun sngi. Nalorkata, la ong ba u Chetia u la shim shuti mynta la saw bnai eiei namar ka jingshitom kaba la ban ïa ka kurim jong u.
“Ka kurim jong utei u heh pulit ka la don hapdeng ka jingshah sumar namar ka jingpang bampong, hynrei ka jingshitom ka la nang jur, bad ki doktor kiba sumar ki la dep ban batai lut nadong shadong ha u Chetia. Hynrei mynta ka janmiet, ka kurim jong u, ka la khlad noh,” la ong uwei u doktor jong katei ka hospital.
Nalorkata, la ïathuh ba u Chetia u la wan poi ha katei ka hospital mynta ka janmiet bad u la bthah ïa u doktor bad ka nos ba kin mih noh na ka kamra ba la pynthiah ïa ka kurim jong u. La ong ba u Chetia u la kwah ban duwai. Hynrei hadien katto katne, la ïohsngew ïa ka jingsawa kaba riew na ka pistol bad u doktor bad ka nos ki la rung biang sha kata ka kamra, bad ki la ïohi ba u la siat ïalade. Na ka liang ki doktor ki la pyrshang ban ai jingsumar ïa u Chetia, hynrei u la khlad noh namar ka jingjur ka jingmynsaw.
Ki khubor ki ïathuh ba u Chetia u la ju long teng u SP ka Sonitpur bad Commandant ka 4th Assam Police Battalion hashwa ba un shah thung kum u Secretary ka tnat pohïing.
