Nongpoh, Jylliew 18
Ha kawei ka jingjia kaba la pynher syrngiew ïa ki paidbah ka sor Nongpoh ha ka janmiet jong ka Sngi Ba-ar, kaba la jan ïasyriem thik kum ha ki phlim, ka la don ka jingther kuli bad ïakthong jong ka kynhun ba kyrpang ki pulit ka Ri Bhoi ïa saw ngut ki runar kiba donkti ban lute na ki trok bad kali kamai ha ka surokbah National Highway 6.
Kine ki runar kiba ju donkti ban lute na ki trok bad kali kamai ha ka surokbah NH-6, ki dei kiba wan na jylla Assam. Ha kane ka sngi ruh ki la donkti biang ban lute na ki trok bad kali kamai da kaba wan kiew da kawei ka Mahindra Scorpio rong lieh bad ka bym pat don ïa u registration number.
La ong ba kine ki runar hadien ba ki la phet krad noh na ka thaiñ Umtrew hadien ba ki la ïohi ïa ki pulit, ki la hiar sha ka thaiñ Nongpoh. Pynban haba ki la ïohi ïa ka jingpynap shrip jong ki pulit, ki la pyrshang ban ñiom beit naphang bad rung pat na ka ‘Service Lane’ bad hadien ka jingshah ther kuli ha ki pulit, kitei ki runar ki la ieh shadien ïa ka kali bad phet shapoh kawei ka khlaw.
Hadien ka jingkthong kaba la neh katto katne por ki pulit ki la ïoh ban kem noh ïa baroh saw ngut. Kine ki kynthup ïa u Pradip Gogoi (38 snem) na Lahual, Chandmai Gaon, Dibrugarh, u Tulan Phukan (36 snem) na Nirkholoiguri, Sivasagar, Lakhimpur, u Pranjal Gogoi (38 snem) na Kakopathar, Tinsukia bad u Deep Das na ka shnong Bugaghat jong ka jylla Assam.
Haba kren sha ki lad pathai khubor, u Bah Banrap Jyrwa uba dei u Additional Superintendent of Police ka Ri Bhoi, u la ïathuh ba na ka liang ki pulit, ki la ju ïoh jingtip la bunsien halor ka jingdon jong ki runar kiba lute na ki trok bad kali kamai bad kiba byrngem byrsit ruh ban shoh khlem jingmap.
U la ïathuh ba ha ka janmiet jong ka Sngi Ba-ar, katba ki dang pynlong ïa ka jingtalasi kali ha ka shnong Saiden, la don uwei u nongñiah trok uba la pyntip halor katei ka jingdon jong ki runar kiba lute ha ki thaiñ Umtrew, bad kumta hi la pyntip noh mar mar ïa katei ka jingjia sha ki pulit ka thanat Umsning bad Umïam.
U la ong ba na ka liang kitei ki runar hadien ba ki la ïohi ïa ka jingwan jong ki pulit, ki la phet krad noh na katei ka jaka sha ki thaiñ Nongpoh bad khynñiat ruh ïa uwei pat u nongñiah trok uba ki la thmu ban rahbor na katei ka jaka kaba don marjan bad ka Umtrew.
Utei u heh pulit u la pyntip ruh ba ha ka jingpynap shrip kaba la pynlong pat ha Nongpoh, kitei ki runar ki la pyrshang ban rat da ka jingthmu ban pynïap ïa ki pulit kiba ap ha katei ka jaka bad rung ruh na ki bynta jong ka service lane ka sor Nongpoh ryngkat ka jingpynher sted kaba la ishyrkhei bad buh jingma ïa kiba bun ki nongïaid nongïeng bad ki kali kiba la pynïeng harud surok.
Ha katei ka jingpyrshang jong ki pulit ban pynsangeh ïa ka kali jong kitei ki runar ha Nongpoh, na ka liang ki pulit ki la hap ban siat ruh ban ïoh kem ïa ki, hynrei kitei ki runar ki la lait salit na ka jingïap bad phet krad sha ki bynta jong kawei ka khlaw kaba don marjan bad ka sor Nongpoh.
U la ïathuh ruh ba hadien ka jingkthong kaba la neh kumba katto katne kynta, ki pulit ki la ïoh ban kem noh ïa kine ki runar na kawei ka khlaw kaba don marjan bad ka Nongpoh.
Na ka liang jong ki pulit ka Ri Bhoi ki la ujor ejahar pyrshah ïa kitei saw ngut ki runar bad ka jingtohkit ban lapdien shuh shuh ïa ki kam lute jong ki bad kiwei kiba donkti ka dang ïaid shakhmat.
