Jowai, Jylliew 18
Ar ngut ki briew kiba la shah kynnoh donkti ha ki ar tylli ki jingjia pynïap briew kaba la jia ha ka 16 tarik Jylliew, ki la wan ban pyndem noh ïalade hakhmat ki pulit jong ka West Jaiñtia Hills District.
Kine baroh ar ngut dei kiba la tip kyrteng kum u Nidaiohi Suchiang uba la shah kynnoh donkti ban pynïap ïa u Drup Sutnga na ka shnong Sahsniang kaba hap ha ka thanat Raliang bad uwei pat u Do Dkhar uba shah kynnoh donkti ban pynïap ïa u Nangtei Dkhar na ka shnong Lumkhudung kaba hap ha ka thanat Jowai.
Katkum ka khubor pulit la ïathuh ba ha ka 17 tarik Jylliew, u Nidaiohi Suchiang 29 snem rta na ka shnong Sahsniang-A u la wan mih sha thanat Jowai bad phla ïa ka jingdonkti ban pynïap ïa la u para marjan u Drup Sutnga.
U Nidaiohi u la phla halor ka jingdonkti ban thombor ïa u Drup Sutnga da kaba pyndonkam da ka tari ba nep bad hadien u la khum da u ksai siej na ryndang jong u Drup ban pyni ha ka rukom ba u la shim hi ïa la ka jong ka jingim.
Shuh shuh u Nidaiohi u la ïathuh ruh ba u la leh ïa kane ka kam pynïap namar u ngeit ba u Drup u dei uba donkti ha ki kam leh byrtong, kata ïa kaba u la ngeit ba ka la wanrah ka jingshitom ïa ka kurim jong u.
Hadien ba la ïoh ïa kane ka jingtip, ki heh pulit na thanat Raliang mardor ki la hiar sha Sahsniang na ka bynta ban pynthikna halor kane ka jingjia. Ha ka jingtohkit, ïa ka metïap jong u Drup, la pynthikna halor bun tylli ki dak mynsaw, kata kaba ïa hap bad ka jingphla jong u Nidaiohi.
Ha kawei pat ka kam pynïap briew, u Do Dkhar, 33 snem ka rta u la wan pyndem noh ïalade hakhmat ki pulit halor ka jingshah kynnoh donkti ban pynïap ïa u Nangtei Dkhar uba dei hi na ka shnong Lumkhudung.
Ki bahaïing hasem jong u Nangtei Dkhar ki la ujor da ka ejahar bad kynnoh ba u Do Dkhar u la dung da ka tari ïa u Nangtei ha ka 16 tarik Jylliew ha Lumkhudung Pohshrah.
Ki bahaïing mar-mar ki la pynkit ïa u Nangtei sha ki jaka sumar hynrei u la khlad noh katba u dang don ha ka lynti sha Moodymmai.
Na ka liang ki pulit ki la pynrung mukotduma halor kine artylli ki jingjia bad ka jingtohkit ka la ïaid shakhmat.
