Shillong, Jylliew 19
Ka Synjuk Ki Shiphew Shnong Phudumbah Area West Khasi Hills District hapoh ka jingïalam u Bah Kharlessbon Nongbri kum u Chairman ha ryngkat ka jingsynranlang u MLA ka Rambrai Jyrngam Constituency, u RG Momin ha ka 19 tarik u Jylliew 2024, ki la leit ban ïakynduh ïa u Bah Prestone Tynsong, Symbud Myntri Rangbah ka jylla bad uba dei peit ruh ïa ka tnad PWD (Roads).
Kane ka jingleit ïakynduh ïa u Symbud Myntri Rangbah ka long ban pynkynmaw bad kyntu ïa u ban shna pynbha bad siang rong noh ïa ka surok khyndew na Rambrai shaduh Mawlangsu kaba la sahteng mynta la kumba 30 snem eiei.
Haba kren sha ki lad pathai khubor hadien ka jingwan ïakynduh ïa u Symbud Myntri Rangbah ka jylla, u Bah Kharlessbon Nongbri u la ïathuh ba ka Synjuk ka la pynsngew ha u Myntri ha kaba ïadei bad ka jingeh kaba ki paidbah jong katei ka dong ka thaiñ ki ïakynduh namar ka jingbym don ïa ka surok kaba bha khamtam ïa ki paidbah kiba don hapdeng ka jingpang jingshitom.
U la ïathuh ba ki paidbah ka thaiñ Mawlangsu haba ki leit donkam ha Rambrai ki hap ban leit shaduh sha Nongstoiñ kaba jngai haduh 50 km, hynrei lada shna pynbha noh ïa katei ka surok na Rambrai haduh Mawlangsu, ka jingjngai kan long tang 11 km.
“Kane ka surok ka dei kaba la donkam kyrkieh namar ba mynta lei-lei la plie ïa ka Block hapoh Rambrai, ki kam-ki jam kin tyllun kloi lada ngi ïoh ïa kane ka surok”, la ong u Bah Nongbri.
U Bah Ignatius Khardewsaw, General Secretary jong ka Synjuk, haba bynrap lang u la ong ba ïa katei ka surok la dep ban trei naduh u snem 1994 eiei hynrei haduh mynta ym pat lah ban pyndep, hynrei na ka liang ka synjuk ka la pynpaw pat ka jingsngew kmen ba u Myntri ba dei peit ïa kane, u la kular ban shimkhia bad ba ïa katei ka surok la dep ban pynkhreh ïa ka DPR kaba kot shaduh ka T. 21 klur tam.
U Bah Khardewsaw u la ong ba kane ka surok ka long kaba donkam haduh katta-katta namar da ki phew tylli ki shnong ki la pyndonkam ïa katei ka surok ban leit ban wan.
“Ngi ngeit skhem ba lyngba kane ka jingwan ïakynduh jong ngi mynta bad da ka jingtrei shitom jong u MLA jong ngi, ngi ngeit skhem ba kane ka surok kan sa urlong ha kine ki bnai bad ki snem ki ban sa wan namar ba kane ka surok ka dei kaba donkam tam ïa kane ka dong ka thaiñ jong ngi baroh kawei”, la ong u Bah Khardewsaw.
U Bah Khardewsaw u la ong na ka liang u Myntri um pat ong lano yn sdang pyntrei noh ïa katei kaba lah sahteng hynrei u la ai ka jingkular ba un sa pynsted noh ïa ka kam ban pyntrei.
Katba na ka liang u MLA haba ai jingkren u la ong ba kum u MLA ruh u la dep ban kren hapoh ïing dorbar thawaiñ ha kaba ïadei bad katei ka surok bad u kyrmen skhem ba da ka jingïatreilang ryngkat ki nongïalam shnong baroh ki jingthmu kin sa urlong.
