Da ka komiti thaw ka Sorkar ban wanrah ka aiñ ryntih halor ka syrnod ST

Ka Sorkar Jylla ha ka Sngi Balang ka la thaw da ka komiti ban wanrah ïa ka aiñ ka ban long ryntih ha baroh kawei ka Jylla na ka bynta ka jingai ïa ka syrnod...

Shillong, Jylliew 19

Ka Sorkar Jylla ha ka Sngi Balang ka la thaw da ka komiti ban wanrah ïa ka aiñ ka ban long ryntih ha baroh kawei ka Jylla na ka bynta ka jingai ïa ka syrnod Scheduled Tribe (ST).

            Ïa kane ka komiti kaba la thaw ha ka jingïalang kaba la lum bad pynïaid da u Symbud Myntri Rangbah ka Jylla ba khmih ïa ka tnat District Council Affairs (DCA) u Bah Prestone Tynsong ha kane ka sngi ha ka jingïadonlang u Myntri ka tnat Social Welfare Bah Paul Lyngdoh, ki MDC ka KHADC, JHADC bad GHADC.

Ïa kane ka komiti yn khlieh da u Myntri ba khmih ïa ka tnat Social Welfare ka Jylla u Bah Paul Lyngdoh kum u Chairman na ka bynta ban pynkhreh ïa ka aiñ ka ban treikam salonsar ha baroh kawei ka jylla katba ki dkhot kin long na ki lai tylli ki Autonomous District Council (ADC) ka Jylla, ka tnat aiñ bad ka District Council Affairs.

            Hadien ba la wai ka jingïalang bad kren sha ki lad pathai khubor, u Bah Paul Lyngdoh u la ong, ba ka jinglum jingïalang ka dei ban wanrah ïa ka rukom treikam kaba long solansar bad ryntih ha ka jingai ïa ki syrnod ST, Tribe Certificate bad ka Clan certificate hapoh ka Jylla baroh kawei.

            U la pyntip ruh ba ka jingïakren bad mih jong kane ka kam ka la long ruh hadien ka jingïatakhuh jong ka Office Memorandum (OM) ka tnat Social Welfare bad ka KHAD (Lineage Act) ka KHADC 1997, ïa kaba la dep ban weng hadien ba u la shimti kum u Myntri ka tnat.

            U la ong ruh ba napdeng ki lai tylli ki ADC, dei tang ka KHADC kaba la don ïa ka aiñ, kata ka KHAD (Lineage Act) ka KHADC 1997, katba ka GHADC pat ka dang don mynta hapdeng ka jingpynkhreh katba ka JHADC pat kam pat don satia.

            Dei halor kane, ba la thaw ïa ka komiti na ka bynta ban shim ïa ki jingai jingmut da ki jingthoh na ki ADC ha kaba ïadei bad kane ka kam, namar ka jingai syrnod ST ka dei ban long kumjuh hapoh ka jylla.

            “Ka kam ai syrnod ST, clan certificate ka dei ban long kumjuh ha baroh kawei ka Jylla, kaba sah mynta ka long ba ngin shim ïa ki jingai jingmut da ka jingthoh na ki ADC lane ki draft Bill jong ki artylli ki District Council, kata na ka GHADC bad JHADC bad hadien ngin sa shong pyrkhat biang,” la ong u Bah Paul.

            “Mynta ngi la pan ïa ki jingai jingmut na ki Autonomous District Council khnang ba ngin ïoh pynmih da kawei ka Office Memorandum kaba treikam ha baroh kawei ka Jylla,” la bynrap biang u Bah Paul.