Shillong, Jylliew 19
U General Secretary jong ka Hynñiewtrep Youths’ Council (HYC), Bah Isaac Basaïawmoit u la pyntip ba kito ki samla bad rangbah kiba la ngop ha ka dih drok ki sdang da kaba mad shi paralok bad hadien kata kin sa kylla kyrni.
U la ïathuh ba ka seng ka la sdang ban khynra ïa kiba dih drok ha sor Shillong bad kylleng ka jylla ka dei ha ka 2 tarik Jymmang 2024 ha kaba palat phew ngut la ïoh bat bad palat lak tyngka u drok ba shongdor kaba ka seng ka la ïoh bat.
Nalor nangta u la ïathuh ki la don 32 ngut kiba ka seng ka la ïoh bat bad la phah noh sha jaka sumar (rehabilitation centre) sha Assam khnang ban lah ïakhun ïa une jingdih ba kyrni.
“Ka jingdih drok kaba kyrni ka la kylla ka jingpang, kumta ïa ka jingpang donkam ban phah sumar ba kin nym ngop shuh ha une u jingdih basniew” u la ong.
U la ïathuh ba katkum ka jingphla kine kiba dih drok ki la sdang nyngkong da kaba mad paralok hynrei katba dang mad haba ki sngewtynnad ki sdang ban kyrni.
Shuh shuh u la pyntip ba kine kiba dih drok ki ju ïoh na Polo, Motphran bad kiwei de.
U Bah Isaac u la ïathuh ba naduh ba ka seng ka la sdang ban khynra ïa ka jingjyllei u drok, ki don ki bahaïing hasem kiba la ngat ïa ki khun ki la phone hi ban pan jingïarap ban phah sha jaka sumar.
U la ong ba haduh mynta kine ki 32 ngut kim pat don kiba wanphai naduh ba la phah sah sha jaka sumar hynrei kin hap ban pyndep ïa kane ka jingsumar haduh ba kin da lah.
U la pyntip ba kiba ngop ha u drok ki don kiba la don khun bad ki don kiba dang samla ruh.
Namar kata, u la kyntu ïa ki khun samla ba kin kiar na une u jingdih uba pynjot ïalade, ka ïing ka sem bad ïa ka imlang ka sahlang.
