Shillong, Jylliew 19
Ka Hynñiewtrep Youths’ Council (HYC), Sengkmie ha ka Sngi Balang ka la phah jingthoh sha u Secretary ka Lokayukta ban pan jingshai halor ka eksamin kaba la pynlong na bynta ka kam ‘Peon’ ha ka 15 tarik mynta u bnai.
Kane ka kam ‘Peon’ ka dei ha shlem treikam ka Meghalaya Lokayukta.
“Ngi la ïoh pdiang katto-katne ki jingujor na ki samla kiba la ïakhun ïa ka eksamin na bynta ka kam ‘Peon’ – ba ïa ki ‘Admit Card’ la ai sha ki nongthep kam ba ka eksamin na bynta ka kam ‘Peon’ kan sa long ha ka 15 tarik Jylliew, 2024 naduh ka por 2 baje mynsngi haduh 3 baje mynsngi na bynta ka sobjek “Aptitude Test”,” la ong u Joint Secretary ka HYC, Sengkmie, samla Mandor Diengdoh Swer ha ka jingthoh ba la phah sha u Secretary ka Lokayukta.
Ha kajuh ka por, u la ong ba ha ka por ba pynlong ïa katei ka eksamin, ki nongthep kam/kyrtong ki la lyngngoh ban lap ba ka thup jingkylli ne ka ‘Question Paper’/‘Booklet’ kam shym la don satia ïa kano-kano ka jingkylli halor ka “Aptitude Test” pynban ka kynthup ïa ki jingkylli kiba don jingïadei bad ka “General Knowledge”.
“Kane ka rukom pynbeit jingkylli da kawei pat ka sobjek na kato kaba la kdew ha ka ‘Admit Card’ ka la ïalam sha kiba bun ki kyrtong/nongthep kam ban ym leh bha naba ki la pynkhreh halor ka “Aptitude Test” ha katei ka sngi ne por. Kane ka pyni ruh ba ka don ka jingbym biang na ka liang ki bor pynïaid eksamin – kaba la ktah pat ïa ki kyrtong kiba la thep na bynta katei ka kam,” la ong u samla Swer.
U la ong ba ka seng ka la ïoh jingtip ruh ba la bthah ïa ki kyrtong kiba wan thoh eksamin ha katei ka sngi ban ai noh ïa ka thup jingkylli ne ‘Question Booklet’ ha ryngkat ki ‘OMR Sheet’ kaba long kaei-kaei ka bym ju kham jia koit.
“Barabor, ka thup jingkylli haba ïadei bad kano-kano ka eksamin, la shah ban rah lang bad ki kyrtong bad hap ban ai noh tang ïa ki ‘OMR Sheet’ hynrei ha kane ka kynti, ka jingbym shah ïa ki kyrtong ban rah lang ïa ka thup jingkylli, ka la pynartatien ïa kiba bun haba ïadei bad ka jingthung kam bad eksamin na bynta katei ka kam,” la ong utei u samla nongïalam.
Kumta, ka seng ka kyrpad ïa u Secretary ban pynshai halor katei ka bynta khnang ba ki kyrtong lem bad ki paidbah ba bun balang kin ym sah ha ka umdum haba ïadei bad katei ka jingthung kam bad ba ki kyrtong/samla kiba la ïakhun ïa katei ka eksamin kin ym don jingartatien halor kane kumjuh na bynta ka bha ka miat jong ka jingkhuid bad jinglong hok.
