Khliehriat, Jylliew 19
Ka ïaid ka ïeng jong ki kali lyngba ka surokbah National Highway 6 ka la kynjah jar ha ka step Sngi Balang namar ka jingïakhih paidbah ban pakhang surok khlem buh por ne Indefinite Strike ba la khot da ka Joint Action Committee (JAC) jong ka dong Namchiang hapoh ka Elaka Narpuh kaba sdang na Tongseng haduh Malidor, East Jaiñtia Hills District.
Kane ka jingïakhih paidbah ka la long ban pynbor ïa ka sorkar ban shna ïa ka surok bah NH-6 kaba ym i kop shuh ban ïoh ïa ka kyrdan National Highway namar ba ka la jot rathai bad kaba dap da ki thliew ki syar bad buh jingma ruh ïa ka ïaid ka ïeng ki briew bad ki kali.
Wat hapdeng ka jingjur jong u slap, hynrei da ki spah ngut ki paidbah ka thaiñ ki la ïa mih ryntih sha surok da kaba sher ruh ïa ki dara kumjuh ka jingshet ja shet jyntah hapdeng surok.
“Lada wan kino-kino ki bor ba halor kiba kwah ban ïakren ban weng ïa ka jingïakhih, ngin ym pdiang da lei-lei tad haduh ba kin maramot ïa ka surok naduh Tongseng haduh Malidor”, la ong u Chairman ka JAC u Bah Lasting Pala haba kren bad ki lad pathai khubor ha Malidor.
U la bynrap ba lada ka jingpakhang surok kan shim por da ki bnai ruh kin ym weng ïa ka jingïakhih ka jong ki katba ka sorkar bad NHAI kim pyndep ïa ka kamram ka jong ki kata ban maramot ïa ka surok bah NH-6.
Kane ka jingïakhih kaba la ïaid palat 12 kynta bad kaba la ïoh ka jingkyrshan jong uba bun balang naduh ki Synjuk nongïalam shnong, nongñiah kali bad haduh ki seng bapher bapher.
Na ka liang u BDO ka Lumshong ha ka janmiet u la hiar sha Malidor ban kyrpad weng noh ïa ka jingïakhih hynrei na ka liang ki nongïalam ka JAC ki la kyntait mardor ïa kane ka jingkyrpad katba ym pat maramot ïa ka surok bah NH-6.
