Mih paidbah ki nong Nongumkap ban shna jingkieng hi da ki siej

Tang hadien shisngi ba ka jingkieng dieng kaba pynïasnoh ïa ka shnong Nongumkap ha West Khasi Hills bad ka East Garo Hills kaba don ha ka wah Ryndi ka la shah rong noh ha ka...

Nongstoiñ, Jylliew 19

Tang hadien shisngi ba ka jingkieng dieng kaba pynïasnoh ïa ka shnong Nongumkap ha West Khasi Hills bad ka East Garo Hills kaba don ha ka wah Ryndi ka la shah rong noh ha ka um ha ka 16 tarik mynta u bnai, ki paidbah nongshong shnong ka Nongumkap ha ka 19 tarik wat hapdeng u slap ki la ïamih paidbah ban shna biang ïa ka jingkieng da ki siej.

            U  Sordar ka shnong Nongumkap u Bah Jeremiia Dkhar u la ong, na ka liang ki nongshong shnong ka Nongumkap baroh shi shnong ki la ïamih paidbah ban shna da ka jingkieng siej kaba pynïasoh ïa ka West Khasi Hills bad ka East Garo Hills namar ba ka jingjynjar kaba shaba palat la katto katne sngi kaba la wanrah ka jingkyrduh mluh, u khaw bad ki jingdonkam kiba man ka sngi hapoh ka shnong ka thaw.

            U la pynpaw ruh “Namar ba kiba duk kim lah ban thied lypa ban buh hapoh ïing, kumta ki donkam man ka sngi kiba bylla mynsngi bad kiba leit thied khaw mynmiet ki donkam ïa ka leit ka wan kaba man ka sngi sha ka ïew ka hat.”

            U Sordar u la ong ruh ba ka ïew ba jan ka don tang ha ka bynta jong ka Garo Hills katba ka ïew ka jong ki pat ka don shaduh sha Riangdo kaba jngai kumba 30 km tam. Kumta dei halor kane ka bynta na ka liang ki nongshong shnong ki la shong pyrkhat bad ha kane ka sngi ki la ïamih paidbah ban ïa shna ïa ka jingkieng siej namar ba lada khlem ka jingkieng ka jynjar ha ka ïaid ka ïeng, ka leit ka wan.

            “Ka jingdonkam kaba man ka sngi namar ba ki don kiba pang ba shitom hapoh ka shnong ka thaw ym lah shuh ban leit shim dawai na ki jaka sumar namar ka jaka sumar ruh ka don ha Nongmisei ka sub center hynrei ka PHC kaba khamjan ka don shaduh Bamer, dei halor kane ka bynta ym banse ban shna ïa kane ka jingkieng wat lada ym lah shuh ban shna da ka jingkieng dieng ban lait ki briew bad ki kali hynrei ha ka jingkyrkieh ngi la shna noh da ka jingkieng siej,” la ong u Bah Dkhar.

            Shuh shuh u la ong ruh ba na ka liang ka shnong ka sngew ban pynsngew sa shisien sha ki nongmihkhmat ba kin phai khmat lem sha kane ka jingeh ka jingjynjar jong ki nongshong shnong.