Shillong, Jylliew 19
Ka Kynhun Myntri jong ka Sorkar Jylla ka la ai jingmynjur ban thung ïa ka shongknor (chairperson) kaba thymmai jong ka Meghalaya State Commission for Women (MSCW) ïa ka Kong Ïamonlang M Syiem kaba ju long ka shongknor jong ka State Commission for Protection of child Rights.
Ïa ka kyrtong ka Kong Syiem la ai jingmynjur da ka Kynhun Myntri ha ka jingïalang kaba la long ha Secretariat ha ka Sngi Balang.
Haba ïathuh ïa kane ka rai sha ki lad pathai khubor hadien ba la wai ka jingïalang jong ka Kynhun Myntri, u Myntri Sorkar u Bah Paul Lyngdoh uba dei u nongaiktien ka Sorkar u la ong ba ka mat ban thung ïa ka shongknor jong ka Meghalaya State Commission for Women ka dei kaba la sahteng la katto katne por, bad ka jingdon ka ilekshon Lok Sabha bad ka jingtreikam ka Model Code of Conduct ka la nang pynslem ban shim ïa ka rai. Kumta ka jingïalang jong ka Kynhun Myntri ka dei kaba nyngkong hadien ba la dep ka ilekshon Lok Sabha ha kaba la shim ïa kane ka rai.
U Bah Paul u la ïathuh ba ka Sorkar ka la ai jingmynjur ruh ban pynjlan ïa ka rta shongthait jong ka shongknor ka Meghalaya State Commission for Women na ka 65 snem sha ka 70 snem ka rta.
Haba kylli katno tylli ki kyrteng ki don kiba dei ban shahjied na ka bynta ban shimti kum ka shongknor ka Commission, u Bah Paul u la ong ba ha kaba sdang ba khot ban thep ïa ki kyrteng, ki don 4 ngut kiba paw kyrteng bad ha ka sien kaba bud ba la khot biang, ki don sa 3 ngut kiba don ha ka thup kyrteng. Kumta u la ong ba la jied ïa ka Kong Ïamonlang Syiem napdeng ki 7 ngut kiba la don ha ka thup kyrteng ban shahthung kum ka shongknor bathymmai jong ka Meghalaya State Commission for Women.
U Bah Paul u la pynshai ruh ba ka Kong Syiem hadien ba ka la kynjoh 65 snem ka rta ka la kut noh ka por jong ka kum ka shongknor jong ka State Commission for Protection of Child’s Rights naduh ka 1 tarik Lber 2024, bad mynta kan shimti kum ka shongknor jong ka Meghalaya State Commission for Women hadien ba la mynjur da ka Kynhun Myntri.
U la ong ba ka Kong Syiem ka la kham don ka jingshemphang bad kum ka shongknor jong ka State Commission for Protection of Child Rights kan long ka jingïarap shibun ha ka rukom treikam ynda la shimti kum ka shongknor jong ka MSCW.
