Na ka 40%, bhah mar 20% sha ki Khasi-Jaiñtia & Garo ba duna ka ïoh ka kot: Hek 

Shuh shuh, nalor kane u la ong ba ka jingbhah kaba 5% ka dei ban leit sha kino-kino ki ‘Schedule Tribe’ bad ‘Schedule Caste’ ka Jylla.

Shillong, Jylliew 19

U Myntri ka Sorkar Jylla, Bah A.L. Hek u la phah ïa ki jingai jingmut sha u Chairman ka Expert Committee, u Retd. Justice Mool Chand Garg haba ïadei bad ka bhah thung kam ka Jylla.

“Katkum ka rai ba la shim No.PER 222/71/138 jong ka 12.01.1972 bad ka ‘Office Memorandum’ No.PER (AR) 25/2022/Pt./3 jong ka 10.05.2022 haba ïadei bad ka bhah thung kam ka Jylla, khlem da ktah ïa ka kumba ka long, ka jingai jingmut jong nga ka long ban bhah 15% na bynta ki thup ‘General Category’,” la ong u Bah Hek ha ka jingthoh ba la phah sha u Chairman ka Expert Committee.

U la ong ruh ba na ka bhah kaba 40% ïa ki jaidbynriew Khasi-Jaiñtia, 20% na kane kajuh ka dei ban leit sha kiba duna na kiba duna tam ha ka ïoh ka kot – longïing BPL jong ki Khasi-Jaiñtia katba ka 20% kaba sah kan leit sha ki jaidbynriew Khasi-Jaiñtia salonsar (General).

Kumjuh, u la ong ba na ka bhah kaba 40% ïa ki jaidbynriew Garo, 20% na kane kajuh ka dei ban leit sha kiba duna na kiba duna tam ha ka ïoh ka kot – longïing BPL jong ki Garo katba ka 20% kaba sah kan leit sha ki jaidbynriew Garo salonsar (General).

Shuh shuh, nalor kane u la ong ba ka jingbhah kaba 5% ka dei ban leit sha kino-kino ki ‘Schedule Tribe’ bad ‘Schedule Caste’ ka Jylla.