Shillong, Jylliew 19
Ka Meghalaya Editors’ and Publishers’ Association (MEPA) ha ka Sngi Balang ka la leh burom ïa 2 ngut ki nongpathai khubor ka Jylla kiba la ïoh khusnam ha ka ri India – ka Kong Alicia Bakor Phanwar bad Kong Princess Giri Rashir – ha ka jingïalang kaba kyrpang ba la long ha Shillong Club.
Ha kane ka jingleh burom, ka MEPA ka la ai sngewbha ïa baroh 2 ngut ki nongïoh khusnam da ka ‘memento’ bad ka shithi ai burom.
Lah ban kdew hangne ba ka Kong Alicia Bakor Phanwar kaba dang 26 snem ka rta ka la ïoh ïa ka khusnam ENBA Gold Award for Best News Producer ha ka 30 tarik Lber, 2024.
Ka dei ruh kawei na ki nongpathai khubor ba dang khynnah tam kaba trei kum ka ‘Shift Newsroom Supervisor’ ha ka India Today TV.
Ha kawei ka liang, ka Kong Princess Giri Rashir pat ka la ïoh ïa ka khusnam ‘Ramnath Goenka Award for Excellence in Journalism’ ha ka 19 tarik Lber, 2024. Mynta ka trei kum ka nongai khubor na Meghalaya ïa ka ‘East Mojo’.
Ïa kane ka jingïalang leh burom la pynïaid da ka ‘Treasurer’ ka MEPA, Kong Banda Blah bad la ïoh ruh ki jingkren na u General Secretary ka MEPA u Bah John W. Thabah, u President, Bah R. Monarch Shabong, u Vice-President, u Rajib Choudhury bad ka Adviser, Kong Patricia Mukhim.
Haba kren ha kane ka sngi, ka Kong Phanwar ka la ai khublei ïa ka MEPA namar kane ka jingleh burom ïa ka. Ka la ong ruh ba ka Meghalaya ka dei ban ïoh jaka ha ki lad pathai khubor jong ka ri India ha kaba ïadei bad ki mat bad ki jinglong-jingman kiba ka Jylla ka don.
Na ka liang ka Kong Rashir ha ka jingkren jong ka, ka la pynpaw ka jingsngewnguh ïa ka MEPA namar ka jingai burom kyrpang ïa ka jingïoh khusnam jong ka.
Ka la ong ruh ba ka dei ka kamram jong ki nongpathai khubor ka Meghalaya ban sei ïa ki mat kiba ïadei bad u paidbah ka Jylla khnang ba kita ki mat kin poi sha ka jingtip jong ki lad pathai khubor ha ka ri India baroh kawei.
Kane ka long katkum ka kyrwoh na u General Secretary ka MEPA, Bah John W. Thabah.
