Jowai, Jylliew 19
Da ka jingbitar halor ka jingbym shimkhia ïa ka jingshah ktah ka Wah Myntdu, ki nongshong shnong ka sor Jowai, ki nongrep kumjuh ki shnong kiba don sawdong ka Myntdu ki la rai ban leit tied jingkhang jong ka ïingbishar Meghalaya High Court.
Ïa kane ka rai la shim ha ka jingïalang kaba la khot pynlong da ka seng Khooid Yaka Wah Myntdu kaba la long ha Iungwalieh Dorbar Shnong Chilliangrai ha ka 19 tarik Jylliew.
U President ka seng Khooid Yaka Wah Myntdu u Bah Khroo Lamsalanki Pariat haba kren sha ki lad pathai khubor u la ong, ka wah Myntdu kaba dei kawei na ki wah kaba bsa umbam umdih ïa ki paidbah ka shnong Jowai kumjuh ki nongrep kala shah thombor na ka jingpyntuid ïa ka khyndew sha ka wah.
U la kynnoh ba ïa kane la leh da ka tnat PWD Roads Jowai Central, u kontraktor jong ka Dhar Construction Company kiba pyntuid ïa ka khyndew na ka jingpyntrei ïa ka surok Jowai Bypass na Khliehtyrshi sha Treiongriang.
U la ong ka jingshah thombor ka Myntdu kala pynlong ïa ki paidbah ba kin ïoh ïa ka umbam umdih kaba jngut bad na ka liang ka tnat PHE ka la ïaleh shitom ban wad ki lad ki lynti ban pynkhuid ïa ka um ba pynpoi sha ki thliew ïing jong ki nongshong shnong hynrei watla katta ruh ki dang ïoh ïa ka um kaba lati bad ka bym long shngaiñ ïa ki ban pyndonkam.
Ha kaba ïadei ka jinglong jingman jong ka wah, u la ong ba kila kyrpad bunsien ïa u DC ka West Jaintia Hills District kumjuh ki tnat treikam sorkar hapoh ka District ban weng ïa ka khyndew kaba la tap ïa ki lyngkha jong ki nongrep kumjuh ruh ban ïoh ïa ka Myntdu kaba lait na ka jingshah thombor, hynrei kat haduh mynta mynne ym don dak don shin ban leh eiei ban pynbha ïa ka wah.
Kumta ym banse ban shim ïa ka rai ban leit tied jingkhang jong ka ïingbishar Meghalaya High Court bad kumjuh ruh ïa u Chairman jong ka National Green Tribunal (NGT).
Ha kaba ïadei bad ka jingong jong u MLA ka Jowai u Bah Wailadmiki Shylla ha ka por ba u wan jurip ïa ka jaka pynkhuid um ka tnat PHE kaba don ha Orkhla Khimusniang, ha ki khyndiat sngi ba la dep, ha kaba u MLA u la ong ba ka um kaba wan na PHE ka long kaba khuid ban pyndonkam, u Bah Khroo L Pariat u la pynshai ba ka um haduh mynta mynne ka dang jngut bad kam long shngaiñ ban pyndonkam ki paidbah nongshong shnong.
U la kyntu ïa u MLA ka Jowai uba dei ruh u Chairman jong ka Environment Committee jong ka sorkar Jylla ba u dei ruh ban leit jurip sha ki bynta ba shna ïa ka surok Jowai Bypass ha kaba ka mei mariang kala shah pynjot, ki dieng ki siej kila shah pom bad shah thyllem lut.
