Shillong, Jylliew 19
Kawei ka ïingbishar ha Ri Bhoi ka la ai bor ïa ki pulit ban tohkit san sngi ïa ki saw ngut ki nonglute na Assam kiba la shah kem ha ka Sngi Ba-Ar na Nongpoh.
Lah ban kdew ba hynnin ka sngi ha ka por janmiet ha Nongpoh, ka la don ka jingbeh thong da ki pulit ïa ki saw ngut ki nonglute bad nongrah bor ïa ki nongñiah trok bad kiwei ki kali kamai ha surokbah National Highway-6 ha Ri Bhoi.
Kitei saw ngut runar ki la wan na ka jylla Assam da kawei ka Scorpio kaba lieh bad ka bym pat don satia ïa u nombor kali.
Hynnin ka sngi katba ki pulit ki dang pynlong ïa ka jingtalasi kali ha ka shnong Saiden, la don uwei u nongñiah trok uba la pyntip halor ka jingdon jong ki runar kiba lute ha ki thaiñ Umtrew, bad kumta hi la pyntip noh ïa katei ka jingjia sha ki bor pulit ka thanat Umsning bad Umïam.
Na ka liang kitei ki runar hadien ka jingïohi ïa ka jingwan jong ki pulit, ki la phet krad noh na katei ka jaka sha ki thaiñ Nongpoh bad ki la khynñiat ruh na kali ïa uwei pat u nongñiah trok uba ki la thmu ban rahbor na katei ka jaka kaba don marjan bad ka Umtrew.
Ha kane ka jingïabeh thong, ki pulit ki la hap ruh ban siat na ki suloi jong ki ban ïoh kem ïa kitei ki runar. Kitei ki saw ngut ki la phet krad na ka kali hajan ka District Court ha Nongpoh bad ki la mareh sha khlaw. Namarkata ka la mih ka jingbeh thong na ki pulit bad la ïoh kem ïa baroh saw ngut.
Ïa kane ka jingbeh thong jong ki pulit la ïoh ruh ban ring dur da ki paidbah kiba la long kum ki nongpeitkai ïa kane ka jingjia.
Kitei ki runar kiba la shah kem noh ha ki bor pulit ki kynthup ïa u Pradip Gogoi (38) na Lahual, Chandmai Gaon, Dibrugarh, u Tulan Phukan (36) na Nirkholoiguri, Sivasagar, Lakhimpur, u Pranjal Gogoi (38) na Kakopathar, Tinsukia bad u Deep Das na Bugaghat jong ka jylla Assam.
