New Delhi, Jylliew 19 (UNI)
Ka Sorkar Pdeng ha ka Sngi Balang ka la pyndam noh ïa ka eksamin UGC-NET Jylliew 2024 hadien ba ka la ïoh jingtip ba ka lah ban don ka jingleh bym hok ha kane ka eksamin tang shi sngi hadien ba la dep pynlong ïa kane ka eksamin ha ka Ri baroh kawei.
Ha u kyrwoh khubor ba la pyllait mynta ka miet, ka tnat pule puthi jong ka Sorkar Pdeng ka la pyntip ruh ba yn aiti sha ka Central Bureau of Investigation (CBI) ba kan pynlong da ka jingtohkit kaba bniah.
Ha kajuh ka por, ka la ong ba ïa ka eksamin bathymmai yn sa pynlong hadien bad ïa ki tarik yn sa pynbna.
Ha katei ka kyrwoh, la ong ba ka National Testing Agency (NTA) ka la dep ban pynlong ïa ka eksamin UGC-NET Jylliew 2024 ha ka ‘OMR (pen and paper) Mode’ ha ka 18 tarik Jylliew, ha ki ar bynta ha ki jaka sor ha kylleng ka Ri.
Hynrei, mynta ka sngi, ka University Grants Commission (UGC) ka la ïoh jingtip halor katei ka eksamin na ka National Cyber Crime Threat Analytics Unit jong ka Indian Cyber Crime Coordination Centre (I4C) kaba don hapoh ka jingkhmih ka tnat Korbar Ri.
La ong ba kumba ka paw mynta, kitei ki jingtip ki kdew ba imat ka la don ka jingleh bym hok ha kaba ïadei bad katei ka eksamin kaba la dep pynlong ha ka 18 tarik Jylliew.
Khnang ban pynthikna ba kan ym don ka jingleh bym hok ha katei ka eksamin, ka tnat pule puthi ka la rai ban pyndam noh ïa ka eksamin UGC-NET Jylliew 2024. Ha kajuh ka por, ka tnat ka la pyntip ba ka CBI kan sa tohkit bniah halor katei ka jingtip ba la ïoh da ka UGC.
