Shillong, Jylliew 19
Hadien ka jingther jong u ’lapbah ha kine ki sngi kaba la wanrah ka jingshlei um bad ka jingshah ktah jong ki shnong ki thaw, ha ka Sngi Balang u Myntri Rangbah ka Jylla u Conrad K Sangma u la lum ïa ka jingïalang ban shong bishar kam lyngba ka video conferencing ban sngewthuh halor ka jinglong-jingman.
Ha kane ka sngi, nalor u Myntri Rangbah la ïadonlang u Myntri ka tnat Revenue & Disaster Management u Bah Kyrmen Shylla, u Chief Secretary Bah DP Wahlang lem bad ki ophisar ka State Disaster Management Authority.
Ha kane ka jingïalang na ka liang jong u Myntri Rangbah haba shim ïa ka jingkheiñ halor ka jinglong- jingman na ki jingshah ktah ha ki District jong ka jylla, u la ong ba ki lad jingïarap sha ki briew ba shah ktah ka dei ban wan hakhmat eh.
Shuh shuh na ka liang jong u Myntri Rangbah u la kular ruh ïa ki District ban ai ïa baroh ki jingkyrshan ba ki donkam bad bthah ruh ba ïa ki lad jingïarap bad ki song pisa sha ki longïing ba duh ïa ki mynsiem briew dei ban pynpoi noh hapoh ka 48 kynta.
Ha kajuh ka por, u la kyntu ruh ïa ki Deputy Commissioner ba kin peitngor bha ïa ka jinglong-jingman khamtam eh ïa ki jaka kiba lah ban shah ktah jur.
Ki bor pynïaid District ki la pyntip ïa ka jingtwa khyndew, jingkhyllem ki dieng kiba la khang lynti ïa ki surok bad ka jingdkut ki sainar ilektrik ïa kiba la dep ban pynkhuid bad maramot.
