Shillong, Jylliew 19
Ka khubor na ki pulit ba la ïohlum ha ka Sngi Balang ka ïathuh ba u Rojendro Koch u la ujor ba ha ka 16 tarik Jylliew ha ka por kumba 7:30 janmiet, uwei u briew ïa uba la tip kyrteng kum u Aniruda Koch bad ki paralok jong u, ki la shoh la dat ïa u ha ka ïew Halchati kaba hap ha Purakhasia Outpost ha West Garo Hills.
Ha kawei pat ka khubor, u Ramesh Prasad u la ujor ba ha ka 16 tarik Jylliew, ha ka por ba u khlem don, ki runar ki bym lah ban tip, ki la wan prong ïa ka jaka sah jong u ha Ideal Lodge Oakland, Shillong bad ki la tuh ïa ki ksiar ki ksah.
Shuh shuh ka khubor na ki pulit ka ïathuh ba kawei ka nongshong shnong na Shillong ka la ujor ba ha ka 15 tarik Jylliew, uwei u runar u bym lah ban tip bad uba la kam ba u dei u mynnong (Agent) ka ‘PhonePe’, u la shukor ïa u kpa jong ka ha kaba u la duh ei T. 19,832.18.
