Jowai, Jylliew 19
Ka jingjur slap ha kine ki sngi ba la dep ka la wanrah ïa ka jingtwa khyndew kaba shyrkhei ha ka shnong Kharkhana bad Lumpyngngad ha Amlarem Sub Division, West Jaiñtia Hills District.
Kane ka twa khyndew ka la jia ha ka 17 Jylliew ha ka por 2:30 mynstep. Ïa kane la sakhi da ki nongshong shnong kiba sah ha bri bad la ong ba ka jingtwa ka khyndew ka long thik kumba khynñiuh u jumai.
Kane ka jingtwa khyndew ka la pynjulor shi katdei eh ïa ki dieng kwai, tympew, synsar bad kiwei ki mar rep. La ïathuh ruh, ba da ki phew hajar tylli ki dieng kwai ki la shah ban ha ka khyndew bad ki jingthung jingtep kila shah tap lut ha ka khyndew kaba la twa.
Ka jingshah ktah ka long kaba jur, khamtam ïa ki 8 tylli ki longïing ha shnong Kharkhana bad Lumpyngngad kiba kynthup ïa ka ïing ka Kong Embhah Shylla, Kong Damayanti Shylladong, Kong Akordor Lamare, Kong Niti Pamblang, Kong Hiltimai Shylla, Kong Silent Shylla, Kong Nishain Khongmawloh bad Kong Miyo Tangsang kaba dei na ka shnong Lumpyngngad.
Ki nongrep kiba im jakpoh na kane ka jaka, ki ong ba ka jingduh jong ki, ka long kaba khraw haduh katta katta bad ba ki la duh jingkyrmen ban pynim pat ïa ka rep ka riang jong ki.
Namar kata, ki la kyrpad ïa ki bor sorkar naduh u MLA, Myntri ba dei khmih ïa ka rep ka riang, SDO, BDO Amlarem ban ïarap pynïoh skhim ïa ki, khnang ba kin lah ban pyndap pynbiang ïa ka jingdonkam jong ki ha ïing hasem bad ki khun ki kti.
Kane ka jingtwa khyndew ka la ktah ruh ïa ka surok PWD kaba la dap khyndew bad pynsahkut ïa ka leit ka wan ki kali. Ha ka 18 tarik Jylliew, ha ka por 4:30 janmiet la phah JCB ban pynkhuid ïa ka khyndew na surok.
Ki paidbah ki ong ba lada u slap u dang bteng, lah ban don biang ka jingtwa khyndew na ki bynta ba sha khlieh ka surok.
