Shillong, Jylliew 19
Ka jingpynïaid ïa ka rukom thungkam katkum ka Roster System lane ka jingbhah ïa ki kam kiba lait kan long noh lyngba ki Deputy Commissioner ym shuh ban ïaid lyngba ka tnat Personnel jong ka Sorkar Jylla.
Baroh shikatta, ki tnat treikam bapher bapher ki kheiñ ïa ka jinglait ki kam bad phah sha ka tnat Personnel, hynrei mynta ki kam kiba lait ha ki district yn kheiñ hi ha ki district namar ki Deputy Commissioner ki dei ki Chairman jong ki District Selection Committee na ka bynta ka jingthungkam ha ki tnat bapher bapher kiba don ha ki district.
Ka Kynhun Myntri ka la mynjur ïa kane bad na ka liang u Myntri Sorkar u Bah Paul Lyngdoh u la ong ba da ka jingpyntreikam ïa ka Roster ha ka bor jong ki DC kan pynsted shibun ïa ka jingthungkam namar ka rukom kheiñ ïa ka roster kan long katkum ka bhah thungkam kaba la batai ha ki district, kaba long 80 na ka 100 na ka bynta ki kam kiba dei tang ha ki district.
