Nongstoiñ, Jylliew 20
Ka Hynñiewtrep Youths’ Council (HYC) Maweit Circle ka la pynpaw ba ka thaiñ Maweit ka dei ka thaiñ kaba dang duna bha ha ka roi ka par lada ïanujor bad kiwei ki dong ki thaiñ bad kumta ha kane ka thaiñ la dei ban wanrah la kumno-kumno haduh 13 tylli ki surok. Halor kane ka bynta bad ka mat, ka HYC Maweit Circle ha ka Sngi Palei ha ka jingïadon lang ki dkhot ka HYC West Khasi Hills ka la leit ban aiti ïa ka dorkhas ha u Superintending Engineer PWD (Roads) Western Circle Nongstoiñ West Khasi Hills ha kaba ïadei bad ka jingdawa ban pynïoh noh ïa ki surok ha ka thaiñ.
U samla Jeremiia Dkhar uba dei u President ka HYC Maweit Circle ha ka jingïakren bad u SE, u la kyrpad ruh ban bteng ïa ka surok na Maweit-Wahblei-Kulang haduh Nongjri namar ka jingdon ka surok tang haduh Maweit ka dang pynjynjar ha ka ïaid ka ïeng khamtam ïa ki shnong kiba don sharum Maweit. Katkum ka jingthoh ba ka HYC ka la aiti sha u Superintending Engineer PWD (Roads) Western Circle la pynpaw bad buh ïa ka jingdawa ban pynïoh noh ïa ki surok PMGSY ha ka thaiñ Maweit ba kynthup ïa ka surok na Maweit sha Nonglangpih kaba la rim bha, ka surok na Wahlyngdoh-Porla sha Shyrkon A haduh Shyrkon B, ka surok na Maweit – Lamjew – Sahrieh shaduh Pyndengshallang, ka surok Maweit-Miangkain shaduh Nongshylliang, ka surok na Risiang shaduh Maweitksar, ka surok na Nongsba – Pulong shaduh Umiang.
Nangta, ka surok na Mawrynñiew ba la dep ïoh 5 km ban bteng biang ban pynpoi shaduh Nongkusba, ka surok na Wahlyngdoh – Porla shaduh Jaiaw, ka surok Nongpathar – Nonglyer shaduh Pyndengbia, ka surok Maweit – Camino Mawblang – Nongriat shaduh Nongmawlih, ka surok na Nongpathar shaduh Umtynru, bad ban ai tender bad ban sdang noh ïa ka surok na Risiang shaduh Riangpoit.
Halor kine ki surok, ka HYC ka la kyntu ïa u SE ba un shimkhia khnang ba kan long ka jingmyntoi ïa ki paidbah nongshong shnong jong ka dong bad ka thaiñ.
