Shillong, Jylliew 20
Ka Sorkar Meghalaya ha ka Sngi Palei ka la pynpaw paidbah ba ka la don ïa ka thong bad ka jingpynkhreh ban pynkylla dur ïa ka thaiñ Umiam ban long ruh kum kawei na ki jaka jngohkai pyrthei kaba itynnad da kaba pynbiang lut ïa ki jingdonkam bad ruh ban buh ïa ki helicopter.
Ïa kane la pyntip da u Myntri ka tnat Jngohkai u Bah Paul Lyngdoh ha kaba u la ong, ka tnat Khlaw ka la mynjur ban ai ïa ka jaka kaba heh kumba 300 akar ban kyntiew ïa ka thaiñ Umïam sha ka jaka jngohkai kaba heh.
“Ngi la dep ban pynkhreh bad ïaid shakhmat hadien ba ka tnat Khlaw ka la pynpaw ïa ka jingkloi ban ai jaka 300 akar na ka bynta ban kyntiew ïa ki kam jngohkai bad ngi kwah ba ka Umïam kan dei kawei na ki jaka ka ban khring bha ïa ki nongwan kai ym tang ha Meghalaya hynrei ha ka thaiñ Shatei Lam-Mihngi baroh kawei,” la ong u Bah Paul.
“Halor ka jingpyni lyngba ki jingthoh bad ki dur ki dar, ka tnat kaba dei khmih ka la bthah ruh ban pynbit pynbiang ïa ki jingdonkam baroh bad ha kaba ngi la mynjur ba ngin pynheh ïa ka Umïam kum kawei na ki jaka jngohkai hapoh ka jylla Meghalaya,” u la ong.
U Bah Paul u la pyntip ruh ba ka thong jong kane ka projek ka long ruh ban pynheh bad pynïar ïa ki shnat (unit) jong ka Meghalaya Tourism Development Corporation da kaba wanrah shuh shuh ki jingdonkam, ki jaka leh sngewbha bad ruh ban kyntiew ïa ka jaka sah kaba la don lypa mynta bad ka Orchid Lake Resort.
Nalor kane, ha kane ka projek yn kynthup ruh ïa ki jingïalehkai um (water sports), ki jaka ïaid kjat hajan jong ka Nehru Park, bad kiwei kiwei ki jingpynbyrngia bad kiwei.
Nalor kata, u la ong ba ka la don ruh ka plan ne ka jingthmu ban wanrah ïa ka helicopter ka ban pynïasoh ïa ka Umïam bad kiwei ki jaka jngohkai kum ha New Shillong Township bad Sohra, da ka jingthmu ban khring ïa ki nongjngohkai.
