Jowai, Jylliew:
Ka shlem treikam jong u Superintendent of Police ka West Jaiñtia Hills kum shi bynta ban ïarap ïa ki samla ba thep kam pulit ka la pynlong ïa ka One-Day Guidance Programme ha District Library Auditorium, Mynthong, Jowai ha ka 18 tarik Jylliew.
Kane jinghikai kaba shisngi ka dei na ka bynta ban pynïoh jingtip kaba bniah, ki jinghikai da kaba pyni, bad ki jingpynshai ha kaba ïadei bad ka jingrung kam pulit.
U Superintendent of Police, Bah Chemphang Syrti, MPS, u Additional SP, VD Sanghiwot Rymbai, MPS, ka Additional SP (Crime) ka Kong CW Lyngdoh, MPS, u SDPO Amlarem Dewansh Pandey, IPS bad kiwei ki ophisar kiba don ryngkat ki la ai ïa ka jingbatai kaba bniah halor ki kyrdan bapher bapher kynthup ka physical fitness test, ka written examination, bad interview.
Hadien ka jingbatai, ki nongthep kam pulit ki la ïoh ruh ban ïaphylliew jingmut bad ki pulit ophisar ban pynshai ïa ki jingartatien ba ki don.
