
Khliehriat, Jylliew 20
Ka jingïakhih pakhang surok NH-6 ba la khot pynlong da ka Joint Action Committee (JAC) jong ka Dong Namchiang kaba hapoh ka Elaka Narpuh ka la poi sha ka sngi ka ba ar ha kaba ki paidbah ka thaiñ ki la pahara ïa ka surok baroh shimiet.
Kane ka jingïakhih ka la sdang ha ka step 19 tarik Jylliew ban pynbor ïa ka sorkar ban shna ïa ka surok bah NH 6- ka bym i kop shuh ban ïoh ïa ka kyrdan National Highway namar ba ka la jot rathai bad kaba dap da ki thliew ki syar bad kaba buh jingma ruh ïa ka ïaid ka ïeng jong ki nongleit nongwan bad ki kali.
Ka jingjulor jong ka surok bah National Highway NH-6 naduh Tongseng haduh Malidor ha East Jaiñtia Hills District ka la long shaba palat, lehse wat ki kulai ruh kim treh shu ban ïaid bad ki jingkular jong ki bor sorkar ban shna bad maramot noh ïa kane ka surok bah ka long tang ki kular lamler suda haduh kane ka khyllipmat.
Kane ka surok bah ka dei kaba pynïasoh ïa ka jylla Meghalaya bad ka Assam, Manipur, Tripura bad Mizoram.