Shillong, Jylliew 20
Ha ka por step phyrngab jong ka 20 tarik u Jylliew, ki nongtrei bylla sngi jong kawei ka kompani kaba pyntrei ïa ka surok ha Sawmer shiteng ki la ïoh bat bad kem ïa uwei u rangbah uba la wan da ka kali kamai da ka jingthmu ban rah tuh ïa ki nar-rod kiba la pynïeng hajan katei ka surok.
Ïa une u rangbah la ïoh ban kem da ki samla kiba trei ïa kane ka surok ha ka por 5 baje mynstep, hadien ba u dang pyrshang ban tuh ïa ki nar-rod bad ban thep hapoh ka kali, katba uwei pat u la lait phet da kaba mareh noh sha ka jaka khlaw mar sien ïohi ïa ka jingshah bat jong utei u rangbah ha kitei ki nongbylla sngi.
Katkum ka jingïoh jingtip, la ong ba utei u rangbah u dei ba la tip kyrteng kum u Willbert Kharmuti uba dei trai shnong na Umthlong, Eastern West Khasi Hills, bad uba la don ar ngut ki khun bad mynta u sah ha nongbah Shillong. Katba uwei ba la lait phet u dei ba la tip kyrteng kum u Starwell Ryntathiang. Kane ka dei katkum ka jingïathuh jong u Willbert Kharmuti uba la shah bat ha kitei ki nongbylla.
Haba ïoh ban kylli tohkit na u Bah Willbert, u la ïathuh ba kane ka dei ka sien kaba nyngkong ba u la wan tuh ha ryngkat bad u paralok jong u (ba la lait phet) da kawei ka kali taksi kamai kaba don ïa u nombar ML 05 P 1502.
Kitei ki samla nongbylla kiba ïoh bat ïa utei u rangbah ki la ïathuh ba man la ka sngi ki nar-rod ki ju jah na kane ka surok bad kim shym la lap dien satia. Hynrei ka dei ha katei ka step phyrngab da ka jingap lang jong ki katto-katne ngut kiba ïa bylla lang ha katei ka surok ki la ïoh ban bat ïa utei u snar nongtuh.
