Jyllei ka jingshah sei pisa khlem jingtip ki trai khamtam lyngba ka Credit Card

Ka khubor na ki pulit ka ïathuh ruh ba u Andy Buhril u la ujor ba ha ka miet jong ka 15-16 tarik Jylliew, ki runar ki la tuh ïa ka thuk-thuk jong u (ML-05AB-7721)...

Shillong, Jylliew 20

Ka khubor ba la ïohlum na ki pulit ha ka Sngi Palei ka ïathuh ba kawei ka longkmie kaba sah ha Shillong ka la ujor sha ki pulit ba hapdeng u Jylliew 2023 bad Ïaïong 16, 2024, ka la don ka jingkhate pisa kaba 17 sien bad kaba la kot sha ka T. 4,45,741 na ka Credit Card jong ka ba dei na ka HDFC Bank, bad ïa kine ki jingkhate pisa, kane ka longkmie kam shym la leh hi lane kam shym la don jingtip eiei.

Ha kawei pat ka jingjia, ki pulit ki la ong ba uwei u nongshong shnong ka nongbah u la ujor ba ki runar ki bym lah ban tip ki dei kiei, bad kiba la kam ïalade bad ki dei ki mynnong/nongtrei ka Reliance Finance Company, ki la shukor ïa u haduh T. 2.85 lak da kaba tyrwa ïa u ïa ka ram ban thied ïing (Home Loan).

Shuh shuh ki pulit ki la ïathuh ba uwei u nongshong shnong ha Shillong u la ujor ba ha ka 17 tarik Jylliew ha ka por kumba 4:53 janmiet, u la ïoh ïa kawei ka ‘phone call’ na ka briew kaba la pynithuh ïalade kum ka Yogita Sharma, bad kaba la kam ba ka dei kaba trei ha ka State Bank of India (SBI). Kham hadien, u la shem pynban ba ka la don ka jingsei pisa kaba T. 1,21,927.40 lyngba ka SBI Credit Card ka jong u bad ïa kane ka jingsei pisa, une u trai um shym la don jingtip eiei.

Ka khubor na ki pulit ka ïathuh ruh ba u Andy Buhril u la ujor ba ha ka miet jong ka 15-16 tarik Jylliew, ki runar ki la tuh ïa ka thuk-thuk jong u (ML-05AB-7721) na ka ïing sah jong u hi kaba don ha Demthring, Shillong.

Ha kawei pat ka khubor, ka Kong Joyluce Mary Kharsyntiew ka la ujor ba ha ka step jong ka 18 tarik Jylliew, ki runar ki bym lah ban ithuh ki la leit prong ïa ka ïing sah jong ka ha Umkdait Nongmensong, Shillong bad ki la tuh ïa ki sainar bording.