Shillong, Jylliew 20
Ki shipai BSF ha ka Sngi Palei, ha u kyrwoh khubor ba la phah, hynrei kaba khlem don jingsoi, ki la kynnoh ba ki la don ki nongshong shnong ka Kuliang ha East Jaiñtia Hills kiba la pakhang lynti ïa ki BSF ha ka miet jong ka Sngi Balang da ka jingthmu ban ailad ïa ki nong Bangladesh ba kin ïoh phet krad.
Ki BSF ki la ong ba ha ka por kumba 9 baje mynmiet jong ka Sngi Balang, shi kynhun ki nong Bangladesh kiba la don kumba 30-35 ngut, da ka jingïarap jong ki trai shnong na India, ki la rung sha u pud u sam jong kane ka Ri lyngba ki jaka ba khlem pat ker sainar. La kynnoh ba ka jingthmu jong kine ki nong Bangladesh ka long ban wan shim ïa ka shini ba khaïi tuh na India da ki nong Kuliang.
Mar ïa ïoh ïa katei ka jingtip, kawei ka kynhun BSF ka la leit sha katei ka jaka, bad na ka liang kita ki nong Bangladesh ki la pyrshang ban phet sha ka shnong Kuliang. La ong ruh ba ha ka jingïabeh thong, kita ki shipai BSF ki la shah khang lad ha ki trai shnong da ka jingthmu ban ailad ïa kitei ki nong Bangladesh ban ïoh phet. Ka la don ruh ka jingkynnoh ba kitei ki nong Kuliang bad nong Bangladesh ki la kawang maw ïa ki BSF bad ki la tim sih tim sang bad byrngem byrsit ruh.
“Ha kata ka jingïakynad, kawei ka longkmie kaba dei ka nong India, ka la thombor ïa uwei u shipai BSF da u sdie, bad uta u shipai u la mynsaw na kti. Sa uwei pat u shipai BSF u la mynsaw ha ka kti kadiang namar ka jingshah kawang maw,” la kynnoh ki BSF da kaba bynrap ba ïa katei ka jingjia la pyntip mardor sha ki pulit ka Umkiang.
Ki BSF ki la ong ba ka shnong Kuliang ka don hajan u khappud bad ka Bangladesh, bad namarkata, ka long ka jaka kaba ju pyndonkam da ki nongkhaïi be-aiñ. Ki la kynnoh ba ki nongkhaïi be-aiñ na India ki ju buh ïa ka shini ha ki ïing ki sem jong ki ne ha ki jaka ba kyrpang, bad nangne, ki ju khaïi ïa ka shini sha Bangladesh da ka jingïarap na ki nongkhaïi be-aiñ na Bangladesh da kaba shim kabu ïa ka jingbym don ki jingker ha khappud.
“Naduh u Kyllalyngkot 2024, ki shipai BSF ha ka thaiñ Kuliang ki la ïoh ban kurup palat 1 lak kilo ka shini, bad namarkata, ki la lah ban khang lad ïa ka jingkhaïi tuh. Ngi kyntu ïa ki trai shnong ha khappud ban sangeh na ka jingdon bynta ha ki kam be-aiñ bad ban kiar na ka jingïarap ïa ki nongkhaïi be-aiñ na Bangladesh,” la ong ki BSF.
Nalorkata, ki la ong ba ka ju long ka rukom na ka bynta ki nong India, kiba ïadon bynta ha ki kam be-aiñ, ban ïakynad bad ki BSF ha kano-kano ka por ba ki pyrshang ban pyntreikam ïa ka bor ba la pynkhamti ha ki, kata, ban ïada ïa ka jingkhaïi tuh lyngba u pud u sam.
Ki BSF ki la ong ba kin sa ai da ka jingthoh sha ki Border Guard Bangladesh ha kaba ïadei bad ka jingïoh rung tuh ki nongkhaïi be-aiñ na Bangladesh sha India.
