Khang kdong ki runar ïa u rangbah bad ka kurim, lute pisa T.40,000

U Rabha u la ujor ruh ba kitei ki runar ki la knieh jubor ïa ka pla kaba don ïa ka pisa T.40,000, ki kot ki sla ba kongsan bad artylli ki Mobile Phone.

Shillong, Jylliew 20

Ka khubor ba la ïohlum na ki pulit ha ka Sngi Palei ka ïathuh ba uwei u nongshong shnong ryngkat bad ka kurim ki la shah khang kdong ha ki runar kiba la kah dur khmat bad ki la lute ïa ka pisa bad kiwei ki jingdon jingem.

Ki pulit ki la ong ba u Sahadev Rabha u la ujor ba ha ka 18 tarik Jylliew, ki la don ki runar kiba la kah dur khmat bad kiba la shong da ka thuk-thuk (AS-18E-7925) bad sa kawei pat ka ar shaka, bad kine ki la khang kdong ïa ki ha ka shnong Manikganj kaba hap ha thanat Mendipathar ha North Garo Hills.

U Rabha u la ujor ruh ba kitei ki runar ki la knieh jubor ïa ka pla kaba don ïa ka pisa T.40,000, ki kot ki sla ba kongsan bad artylli ki Mobile Phone.

Kham hadien pat, ki nongshong shnong ka Beldonpara ki la ïoh bat ïa kitei ki runar ha kane ka shnong. Hynrei, kita ki runar ki bym lah ban ithuh bad kiba don saw ngut, ki la ïoh lad ban phet krad bad ki la iehnoh ïa ka thuk-thuk. Ïa kane ka thuk-thuk la aiti sha ki pulit kham hadien.