Ki la shoh ïa u kurim jong nga haduh ban da kheiñ ka shyieng krung, ki la ktah ruh ïa ka khun, ong ka longkmie ha ka jingujor

Khliehriat, Jylliew 20

Ki pulit jong ka Umkiang Police Patrolling Post kaba hap hapoh ka Lumshnong Police Station, East Jaiñtia Hills ha ka Sngi Palei ki la hap ban pyllait noh ïa ki katto katne ki shipai BSF hadien ka jingleit tur jong ki shipai BSF kiba la don haduh 30-40 ngut.

Kane ka jingwan tur jong ki shipai BSF ka la jia hadien ba ki pulit ka Umkiang ki la khot hajir ïa ki BSF halor ka jingkynnoh ba ki la leit rung jubor ha kawei ka longïing kaba don ha kawei ka shnong ha East Jaiñtia Hills.

Kane ka jingkynnoh ka la wan ha ka dur jong ka jingujor (FIR) na kawei ka longkmie pyrshah ïa ki lai ngut ki BSF.

Katkum katei ka FIR ba la ujor ha Umkiang Police Patrolling Post, la ong ba lai ngut ki briew kiba la kam ïalade ba ki dei ki BSF, hynrei kiba khlem phong ïa ka sopti ‘uniform’, ki la rung jubor sha ka ïing sah jong ka ha ka por kumba 11:30 mynmiet jong ka Sngi Balang.

Ka la ong ba ha ka por ba kitei ki briew ki la wan rung sha ïing, u kurim jong ka, u la shah thombor katba u dang thet kti hadien ba u la dep ban bam ja miet.

“Ki la tan ïa u kurim jong nga shabar ïing bad ki la bteng ban thombor ïa u haduh ba la kheiñ sa kawei ka shyieng krung,” la ong katei ka longkmie ha ka FIR.

Nalorkata, ka la ong ba kita ki BSF ki la wanphai biang sha katei ka ïing ha ka por kumba 12:30 synñia jong ka Sngi Palei, bad ki la nang bun ha kaba ki la don kumba 15 ngut eiei, bad ki la shoh biang ïa u kurim jong ka.

“Ki la knieh ruh ïa ka ‘phone’ na ka khun jong nga, bad ki la ktah kti ïa ka ruh. Nga la pyrshang ban ïada ïa la ka jong ka khun, hynrei kita ki BSF ki la kynjat ïa nga,” la bynrap katei ka longkmie.

“Kitei ki briew (shipai BSF) ki la byrngem ban siat ïa ngi da ki suloi jong ki bad ki la thew ruh da ki suloi jong ki sha ngi. Hynrei ngi la kyrpad ba kim dei ban siat,” la ong katei ka longkmie kaba la kyrpad ïa ki pulit ban leh da kaba tyngeh ïa kitei ki BSF.

Shuh shuh katei ka jingjia ka la paw pyrthei lyngba kawei ka dur khih (video) kaba la saphriang kylleng.

Katkum katei ka dur khih, la ïohi ba ki shipai BSF ki la phong da ki sopti ïing bad uwei u la rah da u sdie katba arngut ki kynthei pat ki dang pyrshang ban knieh ïa u sdie na ka kti jong uta u BSF. Sa uwei pat u BSF u la rah da u dieng.

Ha ka dur khih, la ïohsngew ïa ka sur jong ki kynthei kiba la kyrpad ïa kitei ki BSF ban ym thombor ïa ki kynthei. Ha kata ka jingkyrpad, la ïohsngew bunsien ïa ka kyntien ‘Sir’.

Haba ïakren bad u SP ka East Jaiñtia Hills halor katei ka jingjia, u la ïathuh da kaba ong, “Ngi la dep ban pynrung da ka jingujor ha Khliehriat Women’s Police Station (Case No. 16(6) 2024 hapoh ki kyndon 457/326/354/506/384/34 jong ka IPC bad ka kyndon 7/8 jong ka POCSO Act bad ka jingtohkit ka la ïaid shakhmat.”

“Ngin leh ïa kaba donkam hapdeng ka jingtohkit khnang ban ithuh ïa kiba donkti,” la bynrap u SP.