Jowai, Jylliew:
Ka Synjuk Waheh Shnong Ri Jaiñtia (SWSRJ) ka la ai jingkyrshan kaba pura ïa ka jingïakhih pakhang surok bah NH-6 da ka Joint Action Committee (JAC) jong ka Dong Namchiang kaba hap hapoh ka Elaka Narpuh, East Jaiñtia Hills District.
Ha ka kyrwoh ba la pyllait da u General Secretary Bah Kampher Pohlong u la ong, ka synjuk ka pynpaw ka jingsngewkhia ïa ka jingeh ba ki paidbah ka thaiñ ki ïakynduh na ka por sha ka por ha kaba ïadei bad ka surok bah NH-6.
U la ong ba na ka liang ka Synjuk Waheh Shnong Ri Jaiñtia ka pynrem jur ïa ka jingleh bym suitñiew jong ka sorkar ban pynbha pynmiat ïa katei ka surokbah wat hadien bunsien ka jingdawa ne ujor jong ka JAC ban maramot ne pynbha ïa ka.
Ka surobah NH-6 ka dei u budlum ha ka khaïi pateng jong ka thaiñ lam-mihngi bad ka ktah ruh ïa ka leit ka wan ki paidbah jong ka thaiñ bad kaba lah ban ktah ïa ka im ka ïap khamtam ha ka pang ka shitom, la ong u Bah Pohlong.
Kumta da kawei ka sur bad da kawei ka jingmut ka synjuk ka ai ka jingkyrshan kaba pura ïa ka jingïakhih khot pakhang surok bah NH-6.
