La dep bthah ïa ka DGP & SP ban shimkhia mardor halor ki kam thombor ki BSF

Ka Sorkar Jylla ka la dep ban bthah ïa ka Director General of Police (DGP) bad ruh ïa u Superintendent of Police (SP) ka East Jaiñtia Hills ba kin shimkhia mardor halor ki kam thombor...

Shillong, Jylliew 20

Ka Sorkar Jylla ka la dep ban bthah ïa ka Director General of Police (DGP) bad ruh ïa u Superintendent of Police (SP) ka East Jaiñtia Hills ba kin shimkhia mardor halor ki kam thombor jong ki shipai BSF ha ka shnong Kuliang.

Ïa kane la pyntip da u Symbud Myntri Rangbah ka jylla u Bah Prestone Tynsong uba khmih ruh ïa ka tnat Pohïing ba ka sorkar jylla ka la dep bthah ïa ka DGP bad u SP ka East Jaiñtia Hills ban shim kam mardor katkum ka aiñ pyrshah ïa ki shipai BSF.

Haba kren sha ki lad pathai khubor, u Bah Prestone u la ong, “Ka jingbym phong uniform jong ki BSF ka pyni ba kim shym la don ha ka kam bad ka rukom rung ka jong ki ka long kaba artatien bad ka la pynkhih win ïa ka shnong ka thaw baroh kawei.”

Shuh shuh halor kane ka jingjia, u Bah Prestone u la ong, “Kum kitei ki jait jingleh kiba la ïaid palat pud ïa ki aiñ, dei ban ai ka jingpynshitom katkum ka aiñ bad pyntip ruh ba la dep ban bthah ïa ka DGP bad SP ban pynthikna ba ka aiñ ka dei ban ïaid kumba ka dei ban ïaid bad lada dei ban kem ruh dei ban kem ïa ki BSF.”

Ha kajuh ka por u Symbud Myntri Rangbah u la ong, ka jingleit rung jong ki shipai BSF sha ki ïing briew khlem da phong ïa ki uniform ka la long lypa ka bym ïahap bad kaba la long beaiñ bad kumta ka aiñ ka dei ban leh ïa kaba donkam pyrshah ïa ki BSF.

Katba haba kylli halor ki kam leh donbor jong ki BSF kaba la ju jia na kawei ka por sha kawei pat, u Bah Prestone u la ong, “Ha ki bnai kiba la dep, ka Sorkar ka la thaw ïa ka komiti kaba khlieh da ki Deputy Commissioner (DC) ne ki Sub Divisional Officer (SDO) jong ki Civil Sub Division katkum ka thaiñ ka jong ki. Ha kane ka komiti yn kynthup lang ïa ki nongsynshar shnong, ki BSF, ki ophisar na ki tnat bapher bapher na ka bynta ban peit bad khmih ban wanrah ïa ka shongsuk shongsaiñ bad ruh ban don ka jingïadei kaba ïajan hapdeng ki BSF, Custom, Pulit ne ki ophis sorkar bad lada ka don kano-kano ka jingïasngewthuh bakla ne kano-kano ka mat, kin ïapynbeit ïa kine ki jingeh ha kane ka komiti khlem da donkam ban wanrah sha ka sorkar”.