Shillong, Jylliew:
Ka shlem treikam jong ka West Khasi Hills, Nongshillong ka la pynlong ïa ka prokram ban pynkup burom ïa ki paralok nongrep ki ba la ïoh ka jingkiew arshah (doubling farmers income) ha ka ïoh ka kot ha ka 18 tarik Jylliew, 2024. Kine ki dei ki nongrep kiba la pynïasoh bad ka KVK naduh 2018 haduh 2022 ban pynpoi sha ka thong jong ka Doubling Farmers Income (DFI).
Ha kane ka prokram la shim bynta da ki nongrep kiba hap hapoh jong ka DFI na West bad Eastern West Khasi Hills District. Ha ka jingkren lamphrang u Shri. Saikat Sinha, Senior Scientist & Head KVK, West Khasi Hills u la ai ka jingkhublei kyrpang ïa kine ki nongrep kiba trei shitom ban poi sha kane ka thong, u la kyrpad ïa ka jingkyrshan jong ki ban wanrah ïa ka jingmyntoi bad kyntiew ïa ka distrik ha baroh ki liang.
U Bah J. Sohshang, Sordar jong ka shnong Belkhariang uba long u Kongsan, ha ka jingkren u la pynpaw ba ka thong jong ki nongrep hi ka long ban ïohi ka jingjop ha ki kam jong ki. U la ïathuh ba ka KVK ka ju ïatreilang bad ai jingïarap ha bun ki rukom bad ki nongrep ki dei ban buddien tista ïa ki jingïalam bad ki jinghikai na ka liang jong ka ophis. La ïoh ruh ïa ka jingkren shaphang ki jingmyntoi lyngba ka jingïasnohkti bad jingïatreilang bad ka KVK na arngut ki nongrep kiba la sakhi ïa ka jingkiew arshah ha ka rep ka riang. Shwa ban pynkut noh ïa kane ka prokram la sam ïa ki Certificate sha ki DFI Beneficiary ryngkat ki symbai jhur bad ki trai diengsoh.
