Shillong, Jylliew 20
Ka jingkhmih lynti ban ïoh tang ïa ki kam sorkar ka long ka jingangnud kaba dei eh. Tangba ha kum kane ka juk kyrduh kam-kyrduh jam ka donkam ïa ki khynnah samla ba kin don noh da kawei ka jingmut jingpyrkhat kaba thymmai kata ban sdang ïeng noh ha la ki jong ki kjat da kaba seng ïa ki kam lajong.
Kane ka jingseng kam lajong ym tang ba ka ai jingmyntoi ïa ki nongseng kam hynrei ka ai jingmyntoi lang ruh ïa kiwei pat ba kin ïoh ïa ka lad ïohkam-ïohjam.
Kum kawei na ki nongprat lynti ïa ki nongseng kam lajong, ka Meghalaya Entrepreneurs Society For Community Markets ha ka sngi Palei jong ka 20 tarik.u bnai Jylliew 2024, ka la ïoh ban pynlong ïa ka ïew ïadie-ïathied naduh ki mar mata, ki jaiñ ki nep, ki jingbam jingdih nalor kiweizkiwei ki jait jingdie ïa kaba la pynlong ha All Saints Hall bad ki la don 46 tylli ki dukan die jingdie kiba la die ha katei ka sngi.
Ha katei ka sngi, u kongsan u dei u Myntri Rangbah ka jylla, u Conrad K Sangma bad haba ai jingkren ha katei ka sngi, u la ong ba u ju don ka jingngeit ba lada ngi kwah ba ka imlang ka sahlang, ka jylla bad ka Ri kin kiew bad ïaid shakhmat, ka dei tang lyngba ki nongseng kam lajong ki ban ïalam bad pynkiew ïa ka jylla shakhmat.
“Ka jingseng kam lajong ka long kaei-kaei kaba don jingïajan bha bad ka dohnud jong nga bad nga ju don ka jingngeit ba lada ngi kwah ba ka imlang-sahlang, ka jylla bad ka Ri kin kiew bad ïaid shakhmat, ka dei tang lyngba ka jingseng kam lajong ba ngin lah ban rah ïa ka jylla ne ka Ri shakhmat”, la ong u Myntri Rangbah.
U Myntri Rangbah u la ong ba ka sorkar ka don ïa la ka jong ka bynta ba ka dei ban leh hynrei ka sorkar ka dei tang ka nongkyrshan ne ka shnat ka ban thaw ïa ki kam hynrei ki dei tang ki nongseng kam lajong pat ki ban pynlong bad pyntyllun ïa ki kam shakhmat da kaba thaw ïa ki lad ki lynti ban seng kam lajong.
U la ai ka jingkhublei kaba kyrpang ïa ki nongpynïaid ïa katei ka ïew ïadie-ïathied kiba lum la lang ïa ki nongseng kam lajong na ki bynta bapher-bapher ki ban pyninam bad die ïa ki mar ki mata jong ki.
U la ong ba kum ki nongseng kam lajong kim da donkam eh ban long ki nongseng kiba heh hynrei wat ki nongseng kam kiba rit ruh ki long kiba don kordor bad lyngba kane ka prokram ïadie-ïathied, ka ailad ïa baroh ki nongseng kam lajong na ki bynta bapher-bapher ba kin wan shakhmat ban die bad ban pyninam ïa ki jingdie bad jingshna jong ki kaba long ruh ka jingkyrshan ïa ka ïing ka sem lyngba ka jingmih kaba mih na ka jingdie-jingthied.
Shuh shuh u Myntri Rangbah u la ïathuh ba hapoh ka jylla Meghalaya, ki don haduh kumba 70 hajar ngut ki samla kiba ju pynïasnoh ïalade bad pynrung ïalade sha ka jingïoh kam ïoh jam manla u snem bad u la ong ba lehse, ha ki 10 snem ki ban sa wan kin sa don haduh kumba 80-90 hajar ngut ki samla ki ban pynrung bad thep kam ïalade.
“Lada ngi phai sha ki kam sorkar, ngi don tang kumba 1,500-2,000 tylli ki kam kiba dei jong ka sorkar kiba lehse kiba long thylli”, la ong u Myntri Rangbah.
U la ong ba kin don kumba 68 hajar ngut ki samla kiba kim lah satia ban ïoh ïa ka kam sorkar namar ka jingduna eh ki kam sorkar kiba lait thylli bad u la ong ba khnang ba ka jylla kan ïaid shakhmat, ka long kaba donkam ban thaw ïa lad ai kam ai jam bad ban phai khmat ruh sha kino-kino ki lad-ki lynti kiba plie.
Da kaba pynkynmaw ruh ba ka sorkar jylla hapoh ka jingïalam jong ka sorkar MDA ha ki 5 snem, ka la thaw ïa ka prokram CM Elevate kaba dei ka prokram kaba la buh thong ban ai jingïarap haduh kumba 20 hajar ngut ki nongseng kam lajong da kaba ai jingkyrshan ïa ki lyngba ka song pisa bad ka jingai jinghikai kumno ba kin seng ïa ki kam lajong.
U Myntri Rangbah u la pynshlur ruh ïa ki samla jong ka jylla ba kin pynrung kyrteng ïalade ha ka prokram CM Elevate ba kin ïoh ïa ka jingmyntoi kaba bha tam lyngba ka jingseng kam lajong.
