Shillong, Jylliew:
Ka Hynñiewtrep Integrated Territorial Organisation (HITO) Shillong City ha ka 17 tarik u Jylliew 2024 ka la leit ban ujor bad ban buh da ka shithi ha ka shlem treikam jong u Commissioner ka tnad Transport (DTO) halor ka jingdon jong katto-katne ki paidbah kiba la ujor ha kaba ïadei bad ka jingmih ki kompani ba leit die ïa ki mar ki mata ha ki shnong ki thaw khlem da don ne pynbiang ïa ka ‘Commercial License’ ne ka laisen khaïi katkum ki kyndon ba la buh.
“Ka la don ka jingujor na ka liang ki paidbah ba ki la don katto-katne tylli ki kali bad ki kompani kiba la wan die ïa ki mar ki mata hapoh ki shnong jong ki bad kine kim don ïa ka ‘Commercial License’ ban treikam”, la ong ka seng.
Ka seng ka la ong ba halor kane ka jingujor ba la ïoh na ki paidbah, ka seng ka la wan mih sha ki bor ba dei khmih ban pynshai halor kane ka jingujor jong ki paidbah bad kumno kane ka la ktah ïa ki paidbah bad shnong.
Ka seng ka la ong ba hadien ba kane ka jingwan ïakynduh ïa ki bor ba dei khmih, na ka liang ka tnad ka la kular ba kan sa peit bniah halor kane bad ka la kular ruh ba kan sa pyntip ha ka seng ïa ki lynti ba kin shim bad ban leh.
