Shillong, Jylliew 20
U General Secretary ka Khasi Students’ Union, East Jaiñtia Hills District, Bah Kwilnis Suchiang u la pyntip ba ki nong Bangladesh ki wan kiew tuh sha India da kaba rung na ki ‘home pipe’ bad kiew najrong ki sainar shiah ban tap da ki tin bad lyntang ban lait na ki jingmynsaw.
Haba ïakren bad ki nongthoh khubor ha Shillong Press Club, u Bah Kwilnis u la ïathuh ba ka seng ka la leit ban buh ka jingujor sha ka Director General of Police (DGP) ka Jylla, Kong Idashisha Nongrang ban pynkynriah noh ïa ki BSF kiba buh ktem ha shnong Sonapyrdi namar ki ju pyndik ïa ka leit ka wan jong ki paidbah.
U la ong ba ki BSF ki dei ban shong ha khappud ban peit ïa ka jingwan rung tuh ki nong Bangladesh, hynrei balei ki wan shong ha Sonapyrdi kaba jngai haduh 40km na khappud.
U la ïathuh ba ka DGP ka la kular ban khot jingïalang bad ki bor ba ha khlieh ki shipai BSF halor kane ka jingdawa jong ka seng.
U la ïathuh ba ka seng ka la dep phah jingthoh sha u Superintendent of Police bad Deputy Commissioner ka East Jaiñtia Hills District bad ïa u Symbud Myntri Rangbah ka Jylla u Bah Prestone Tynsong, hynrei kim shym la leh eiei. Kumta ki la wan ïakynduh markhmat bad ka DGP.
U la ong ba ka jingdawa ban pynkynriah ïa ki BSF namar ki paidbah kiba ïaid lynti ban leit sha Huroi, Hingaria ki ju shah pyndik man ka por haba ki ïaid lynti.
Namar kata, u la buh jingkylli kumno ki BSF ki wan buh ïa ka ktem haduh Sonapyrdi haba kim shym la ïoh ïa ka jingbit na ki trai jaka bad na ka shnong ruh? Kumta ki la dawa ba dei ban pynkynriah mardor ïa ki BSF.
