Shillong, Jylliew 20
U nongïalam ka NPP uba dei ruh u MP ka Rajya Sabha, u Dr WR Kharlukhi u la ong ba ka jingpynkhih halor ka bhah thungkam ka long kumba shah thap na baroh arliang ïa ka seng ha kane ka ilekshon MP ha kaba ki paidbah ki la pyrkhat da kumwei pat.
U Dr Kharlukhi u la ong ba u ai ka jingïaroh ïa ka Sorkar Jylla bad ïa u Myntri Rangbah namar la leh ïa ka kam kaba dei kum u nongïalam hynrei ki paidbah lehse ki shim da kumwei pat ha kaba ïadei bad kane khamtam hadien ba la don ka jingpynkhih da kaba shahthngan.
“Nga ïaroh ïa u Myntri Rangbah namar ka don ka por ha ka saiñ hima sima na ka bynta ka jingïatylli ka Jylla, bad ka bha ba rem ilekshon namar hynrei kum u nongïalam (statesman), phi lah ban rai ïa kaba bha”, u la ong.
U la ong ba ki paidbah ki don ka jingkhmih lynti kaba khraw na ka jingpynkhih ïa kane ka mat bad kane ka long kumba shah thap na baroh arliang ha kaba ki paidbah ha Rilum Garo ki pyrkhat da kumwei pat bad ki phaikhmat sha ka Congress bad ha Rilum Khasi Jaiñtia ki don kawei pat ka rukom pyrkhat ïa ka Sorkar. Une u President barim ka NPP ha Jylla u la maham ruh ba ka dei ka dak kaba sniew ïa ka Jylla lada ïa ka ilekshon la jop tang namar ka jingshah jingit bad shu rai da ka jingsngew.
U Dr Kharlukhi u la ong ba ka NPP ka tyngkhuh bad ka lyer kaba beh na ka bynta ka VPP ha Ri-lum Khasi Jaiñtia bad ka lyer kaba ki paidbah ki sngewdei ban kyrshan ïa ka Congress ha Ri-lum Garo ha ka ilekshon Lok Sabha ba dang shu dep. U la ong ba ka NPP ha baroh ar jaka, ka rem namar ka Reservation Policy.
“Ha Khasi-Jaiñtia, ki kwah pynkylla, ki peit bad shim ïa ngi kum kiba pyrshah, bad ha Rilum Garo pat, kim pat kwah ban pynkylla bad ki shim ïa u Myntri Rangbah kum u briew ba shimkhia ïa ka jingdonkam jong ka Khasi Hills” u la ong.
Halor ka jingkylli ba rem namar ka jingkyrshan ka BJP, u Dr Kharlukhi u la ong ba ha ka jingkheiñ jong u, ka NPP kam shym la rem ïa ka ilekshon tang namar ka rai jong ka BJP ban ai ka jingkyrshan bad um ngeit satia ïa kane.
U la ong ba ha u snem 2016 ym tang ba ka BJP ka kyrshan ïa ka NPP hynrei wat u Myntri ka Tribal Affairs ba mynta u Jual Oram (nongïalam ka BJP) u la ïalap ilekshon lang ha Tura ha kaba u CM u la jop ïa ka ilekshon MP shiteng samoi na Tura bad thaw ïa ka khana sahkynmaw ha Ri-lum Garo.
