Nongpoh, Jylliew:
U MLA jong ka Nongpoh u Bah Mayralborn Syiem ha ka Sngi Balang u la leit ban plie paidbah ïa ki skhim pynroi ha ka shnong Umjari, Ri Bhoi District kiba kynthup ïa ka ïing skul bathymmai jong ka Umjari Lower Primary Government School, Umjari kaba la shna lyngba ka State Scheme, ka jaka leit shabar paidbah lem bad madan phutbol jong ka shnong Umjari kiba la shna lyngba ka skhim Special Rural Works Programme (SWRP).
Ha kane ka sngi la wan ban ïadon ryngkat da u R Rizal, Sub-Divisional School Education Officer (SDSEO) ka Ri Bhoi District, u P Yadav, Block Mission Coordinator ka Umling Block, u Bah Kyrshan Sulein, Rangbah Shnong ka Umjari bad kiwei kiwei nalor ki dkhot ka Managing Committee bad nonghikai jong ka skul bad ki khynnah skul.
Haba kren ha kane ka sngi, u Bah Mayralborn u la pynpaw ïa ka jingsngewkmen ban ïoh ïashim bynta ha kane ka jingplie ïa ka bynta jong ka ïing skul bathymmai jong ka skul Umjari Government Lower Primary School, ka jaka leit shabar jong ki paidbah bad ruh ïa ka madan phutbol jong ka shnong Umjari.
Ha kaba ïadei bad ka jingud jingnam jong ki nongpynïaid skul bad ki nongïalam shnong halor shibun ki kam pynroi kiba kane ka skul bad ka shnong ka dang duna bad donkam ban pynbit pynbiang, u Bah Mayralborn u la buh ka jingkyntu ba kin long kiba ïaishah shipor naba kum u nongmihkhmat, u la pyrshang ban buddien ban pynïoh ïa kine ki jingdonkam jong ka skul bad ka shnong ka thaw hi baroh kawei ba kynthup ruh ïa ka umbam umdih bad kiwei kiwei ki kam pynroi khnang ba kan long ka jingmyntoi ïa ki paidbah nongshong shnong hi baroh.
Katba u SDSEO ka Ri Bhoi pat u la ai ka jingkular ba na ka liang ka jong u ruh un ïaleh ban thaw ïa ki lad ki lynti ban pynïoh ïa ki jingdonkam jong ka skul, wat lada kam dei ka kam kaba lah ban pynurlong noh mynta mynta. Namar kata, u kyrmen skhem ha ki por ki ban dang wan yn sa lah ban ai ïa ki lad jingïarap kumba ka skul ka donkam.
