Jowai, Jylliew 20
Ka Sorkar Jylla ka la pyllait ïa ka song pisa jong ka Jaiñtia Hills Autonomous District Council (JHADC) kaba long haduh T. 30 klur na ka bhah khajna jong u dewïong.
Ïa kane la pynthikna da u Chief Executive Member (CEM) ka JHADC, Bah Thombor Shiwat ha ka 20 tarik Jylliew, uba la ong ba ka Sorkar Jylla ka la dep ban pyllait ïa ka pisa T. 30 klur tyngka sha ka council.
U CEM u la ong ba kane ka wan jia hadien ba ki dkhot ka Executive Committee ka Council bad ka District Executive Committee jong ka NPP ki la kyrpad ïa u Myntri Rangbah u Conrad K Sangma ha ka 6 tarik Jylliew ban ïarap pyllait ïa ka tulop shuwa ka Behdieñkhlam.
U la ong ba na kane, kaba sah ka long sa T. 50 klur na ka khajna jong u dewïong bad `9.91 klur tyngka na u mawshun bad kiwei.
Na ka liang u Myntri Rangbah, Conrad K Sangma u la kular ban shimkhia ban pyllait sa kine kiba sah ha kine ki sngi ban wan, la bynrap u Bah Thombor.
U CEM bad ka Executive Committee kaba u ïalam baroh kawei ka la pynpaw ïa ka jingsngewnguh ïa u Myntri Rangbah ka Jylla u Conrad K Sangma uba shimkhia ban ïarap ïa ka council ban pyllait ïa ka bhah ka council na ka bynta ba kan ïoh ban pyllait ïa ka tulop jong ki nongtrei.
“Kane ka jingshimkhia u Myntri Rangbah ban pyllait ïa ka pisa, ka pyni ba u dei u briew uba pyndep ïa kaei kaba ong bad ka jubanlak kaba u khlei,” la ong u Bah Thombor bad bynrap ruh ba u kyrmen ba ka sorkar MDA 2 ha ka jingïalam jong u Myntri Rangbah kan shimkhia ruh ban pyllait ïa ka bhah jong ka council man la ka bnai khnang ban ym thut ka jingpynïaid kam jong ka.
