Shillong, Jylliew 20
Ka Congress kaba don saw ngut MLA ka lah ban duh noh ban bat ïa ka kyrdan nongïalam ka Liang Pyrshah bad na ka liang u Lamphang ka Ïingdorbar Thawaiñ ka Jylla u Thomas A Sangma u la ong ba ka jingithuh ïa ka Congress kum ka seng Liang Pyrshah kaba lamkhmat ka dei tang namar ka jingantad ba ka VPP ka la ai jingkyrshan lang khamtam hadien ba ka VPP ka la kyrshan ïa u Saleng A Sangma ban shimti ïa ka kyrdan ‘Opposition Chief Whip.’
Haba ki nongthoh khubor ki buh jingkylli ïa u Lamphang ka Ïingdorbar Thawaiñ ha ka Sngi Palei, u la ong ba um pat lah ban ong eiei ïa mynta la kan don ne em ka jingpynkylla ïa u nongïalam ka Liang Pyrshah namar haduh mynta ka shlem treikam jong u kam pat ïohpdiang kano-kano ka jingthoh ha kaba ïadei bad kane ka bynta.
U Lamphang u la pynpaw ïa kane haba ki nongthoh khubor ki buh jingkylli la kan don ka jingpynkylla ïa u nongïalam ka Liang Pyrshah namar ka Congress ka la nang duna ka jingdon ki MLA bad mynta ka don sa saw ngut ki MLA hadien ba la iehnoh kam u Saleng A Sangma kum u MLA ka Gambegre konstitwensi namarba u la shahjied kum u MP ka Tura parliamentary konstitwensi.
U Saleng u la iehnoh kam kum u MLA ka Congress na Gambegre konstitwensi ha ka 10 tarik u Jylliew 2024.
U Lamphang u la ong ba lada ki lai tylli ki seng saiñ pyrthei kiba don ha ka Liang Pyrshah ki phah jingthoh bad lada ki pynpaw ba ki kwah ban ïadonlang kum kawei ka Liang Pyrshah, na ka liang jong u un sa khmih ïa kane.
Haba kylli, kaei ka nongrim kaba ma u kum u Lamphang u la ithuh ïa ka Congress kum ka seng ban lamkhmat ïa ka Liang Pyrshah ha Ïingdorbar Thawaiñ khamtam ban thung ïa u Saleng A Sangma kum u Opposition Chief Whip, u Lamphang u la ong ba ka jingthung ïa u Saleng A Sangma ha ka kyrdan Opposition Chief Whip ka dei namar ka jingphah shithi ka VPP ba ka kyrshan ïa ka kyrteng jong u Saleng.
Hynrei u la ong ba wat lada ka VPP ka khlem phah shithi ban kyrshan ïa u Bah Ronnie, hynrei la antad ba ka VPP ka ai jingkyrshan ïa ka Congress ban long ka seng kaba lamkhmat ïa ka Liang Pyrshah, bad dei kane ka nongrim ha kaba la thung ïa u Bah Ronnie V Lyngdoh kum u nongïalam ka Liang Pyrshah.
Haba kylli la un dang ithuh ïa u Bah Ronnie kum u nongïalam ka Liang Pyrshah namar ka Congress ka don sa tang saw ngut ki MLA, katba ka TMC ka don san ngut ki MLA, u Lamphang u la ong ba na ka liang jong u, un sa ïasyllok bad baroh lai tylli ki seng saiñ pyrthei kiba don ha ka Liang Pyrshah bad un sa khot ïa ki ban ïakren ïa kane.
Lah ban kdew hangne ba lai tylli ki seng saiñ pyrthei kiba don ha ka Liang Pyrshah ki long ka TMC kaba don san ngut ki MLA, ka Congress kaba don sa saw ngut ki MLA na ka san ngut, bad ka VPP kaba don saw ngut ki MLA.
