Shillong, Jylliew 20
Ki nongñiah taksi kiba kamai na Laitumkhrah, Rynjah, Umpling ki la ud namar ki hap ban ïaid kyllaiñ shaduh Nongmensong, Ishyrwat ban leit sha Umpling, Nongrah, shaduh Rynjah lada wan na Demseiñïong namar bym shah shuh ban rung ki kali na Urkaliar sha Rynjah.
Ka jingsdang ban trei ïa ka surok na Urkaliar sha Nongrim Hills ban leit sha Rynjah ka la sdang mynta la ar bnai eiei. Hynrei kane ka jingtrei ka dang sdang ban khoh rong bad pynhap mawria na ki thaiñ Urkaliar kaba don hajan Nongmensong katba ka surok ba wan na Nongrim Hills ym pat sdang ban khoh ïa ka rong.
Ïa ki kali kiba wan na Rynjah la phah ïaid beit sha Laitumkhrah. Haba ïakren bad u Bah Shimladlang Rynjah, Working President Synjuk Local Taxi Sor bad Khapsor, u la ong ba naduh ba la sdang shna ïa ka surok na Urkaliar ban leit sha Rynjah ka la buh jingeh ïa kiba kamai kali namar kiba wan na Polo ki hap ïaid na Laitumkhrah kaba la pynsahkut ïa ki kali kiba kamai na Demseiñïong sha Laitumkhrah.
U la ong ba ka jingshna ïa kane surok la dei ban sdang naduh ka aïom tlang kaba kham rang bad ïoh shuti ki skul, hynrei mynta ki khynnah skul ki sahkut kali namar ka jingïarung tang kawei ka lynti.
U la ong ba lada ïaid na Demseiñïong sha Laitumkhrah Police Point ka jan ban leit sha Rynjah sha Umpling hynrei ka la pynsahkut kali pat sa ïa kiba kamai sha Laitumkhrah.
Shuh shuh u la ong ba lada ki nongñiah kim kwah ïa ka jingdheng kali ki hap ïaid na Nongmensong, Ishyrwat sha Umpling, Nongrah, Rynjah ka la kyllaiñ palat.
Kumta u la kyntu ïa ka sorkar ba ka dei ban pynsted ïa kane ka surok khnang ban nym sahkut ki kali ha Laitumkhrah khnang ban nym ktah ïa kiba kamai taksi ha Laitumkhrah.
