Shillong, Jylliew 20
U MP ka Jylla uba mihkhmat sha ka Ïingdorbar Thawaiñ Rajya Sabha, u Dr Wanwei Roy Kharlukhi u la ujor da ka ejahar sha ka Cyber Crime jong ka tnat pulit pyrshah ïa kawei ka lad pathai khubor YouTube shimet kaba batai shaphang ka skhim MP ha Jylla ha kaba u la kynnoh ba ka rukom batai u youtuber ka la pynlong ïa ki nongpeit bad nongkynthoh ban kynnoh bamsap bam tuh ïa ka skhim MP.
Haba kren sha ki lad pathai khubor ha ka Sngi Palei, u Dr Kharlukhi u la ong ba ka rukom batai u youtuber shaphang ka jingmang ïa ka MP skhim jong ki lai ngut ki MP kynthup ïa u kum u MP Rajya Sabha ka la pynlong ïa ki nongpeit bad ki nongkynthoh ban pyrkhat bad ngeit ba ka don ka jingleh thok bad bamsap.
U Dr Kharlukhi u la ong ba kum u briew um dei uba biang lut bad uba hok, hynrei kum u briew u ñiewkor ban im ka jingim kaba beit bad ban leh ïa kaba dei.
Kumta u la ong ba lada don kano-kano ka jingleh thok ïa ka MP skhim jong u, ma u hi un thoh sha ka Sorkar ban phah tohkit, bad lada lap ba don kano-kano ka jingleh thok bad lada pyntrei ha ka kyrteng jong u kum u MP, u kloi ban ngat ha ka jingpynshitom.
Hynrei une u MP ka Rajya Sabha u la ong ba hadien ba u la shahjied kum u MP Rajya Sabha, ka skhim ha u snem ba lynshop ka jingpang COVID ym shym la lah ban pyntreikam hynrei hadien ba la pyntreikam ha u snem 2022-2023, la mang lut bad sam lut sha ki shnong ki thaw.
U la ong ba ka skhim MP jong u snem 2023-2024 ruh la pyntrei bad ka dang don sa katto katne kaba dang sahteng namar ka wan noh ka ilekshon MP bad mynta ba la dep ka ilekshon, ka jingpyntrei kan ïaid biang.
U Dr Kharlukhi u la ong ba ka jingbatai shaphang ka skhim bad ka jingkynthoh ka pyni sha ka pyrthei la kumba ma u kum u MP Rajya Sabha u donbynta ban bamsap bad leh thok ïa ka skhim wat haba u khlem don kum kata ka jingmut.
Kumta u la ban biang ba lada don kano-kano ka jingleh bym dei u kloi ban iehnoh ïa ka jinglong MP bad phah tohkit ha kano-kano ka kynhun la ka dei ha ka CBI ne kano-kano ka kynhun tohkit.
