Shillong, Jylliew 21
Ka Indian Institute of Technology (IIT), Guwahati ka dang pule bniah biang ïa ka jinglong-jingman jong ka jingkieng Umïam ha shwa ban dep ki kam maramot ïa ka jingkieng khamtam eh ban sngewthuh la ka biang ne em ban shah ïa ki kali kiba kit jingkit khia ban ïaid lyngba kane ka jingkieng.
Ka jingmaramot ïa ka jingkieng bad ka jingpynkhlaiñ ïa ka dam Umïam ka dang ïaid bad ki kam kiba la leh ki long katkum ki jingai jingmut ki riewshemphang kynthup kiba dei na ka IIT Guwahati.
U Chairman cum Managing Director ka MeECL, u Sanjay Goyal u la ong ba baroh ki kam maramot kiba la leh ki dei katkum ka jingai jingmut ki riewshemphang.
U Goyal u la ong ba ki riewshemphang ka IIT Guwahati ki la pule bniah biang ïa ka jinglong-jingman jong ka jingkieng khamtam haba kaba ïadei bad ka jingïaid ki kali namar ïa kane ka jingtei la pynwandur naduh ki phew snem kiba mynshwa kiba long ban ïaid tang katto katne ki kali ki bym da kit jingkhia palat pud.
Hynrei mynta, ki la mih bun jait ki kali bad kiba kham khlaiñ ruh ban kit jingkit kiba kham khia katba ka jingtei pat ka sah kumjuh.
Haba kylli la ka jingpyrkhing ïa ki kali kiba kit jingkit khia kan bteng wat hadien ba la dep maramot ïa ka jingkieng, u Goyal u la ong ba ka IIT Guwahati kan sa khmih bniah ïa kane bad ai ïa ka rai jong ka.
