Hadien ba shah weng u Lyngdoh ka Hima Sohïong, dawa ka JAC ban jied da uwei hapoh shi bnai

"Ngi kwah ïa ka jingleh kaba la leh naduh ki por mynshwa ba na ka liang ki khun ki hajar kin jied ïa u Lyngdoh ka Hima Sohïong", la bynrap u Bah Shabong.

Shillong, Jylliew 21

Ka Joint Action Committee jong ki Khun ki Hajar ka Hima Sohïong hadien ba ka Khasi Hills Autonomous District Council (KHADC) ka la weng noh ïa u Bah Bashemphang Thabah kum u Lyngdoh jong ka Hima Sohïong ha ka 14 tarik Jylliew 2024, ka la kyrpad ïa ka KHADC ba kan jied noh kham kloi ïa u Lyngdoh bathymmai jong ka Hima Sohïong hapoh ka shi bnai.

Haba kren sha ki lad pathai khubor ha Shillong Press Club, u Bah Purningstar Shabong uba dei u Chairman ka JAC, u la ong ba ka jingdawa jong ka JAC ban weng noh ïa u Bah Bashemphang Thabah kum u Lyngdoh ka Hima Sohïong ka dei ka jingdawa kaba la neh naduh u snem 2019 haduh 2023. Hynrei na ka liang ka District Council lyngba ka hukum ba la pynmih ha 14 tarik u Jylliew 2024 ka la weng noh ïa u Bah Bashemphang Thabah na ka khet jong ka Hima Sohïong.

“Shibun kiei-kiei kiba na ka liang jong ka JAC ha ryngkat ki ‘riew rangbah, ki seng samla shnong bad ki khun ki hajar jong ka Hima Sohïong ki la ïa mih shakhmat ban ïa tur bad dawa ha kaba ka jingïakhun jong ngi khlem kynran dien bad khlem pyndem ka dei kaba la neh kumba 5 snem”, la ong u Bah Shabong.

U Bah Shabong u la ong ba hapdeng kine ki 5 snem, ka JAC ka la ïaid shibun bah ki jingeh bad ki jingshah kren beiñ ha ryngkat ka jingshah pynngat ha ki kyndon aiñ ha kaba ka lah don ruh ka jingtur kynsan sha District Council ban pynpaw ïa ka jingpyrshah bad ba dei ban weng noh shisyndon ïa u Bah Thabah kum u Lyngdoh ka Hima Sohïong.

“Ha kaba khadduh ka jingïaid lynti jong ka JAC bad ka jingkyrshan jong ki riew rangbah jong ka Hima, ngi la poi sha ka thong ha kaba na ka liang ka Council ka la weng noh ïa u Bah Bashemphang Thabah na ka khet kum u Lyngdoh jong ka Hima Sohïong kumba ka JAC ka la dawa”, la bynrap u Bah Shabong.

U Bah Shabong u la ong ruh ba na ka liang ka JAC ka la kyrpad ïa ka District Council ba kan pynkloi noh ban jied ïa u Lyngdoh bathymmai hapoh ka Hima Sohïong bad ban ai ruh ïa la ka jong ka aiñ kumba long lem sha kiwei pat ki Raid bad ki Hima.

U la ong ruh ba na ka liang ka JAC ka dawa ruh ba na ka liang ka Council ka dei ban ailad ban jied ïa u Lyngdoh bathymmai jong ka Hima Sohïong da ki khun ki hajar jong ka Hima Sohïong ym shuh da ki Saw Lyngdoh kumba la ju leh ha ki snem bad ki por kiba la dep.

“Ngi kwah ïa ka jingleh kaba la leh naduh ki por mynshwa ba na ka liang ki khun ki hajar kin jied ïa u Lyngdoh ka Hima Sohïong”, la bynrap u Bah Shabong.