Khliehriat, Jylliew 21
Ha ka jingïadei bad ka jingjia shah kynnoh ba ki shipai Border Security Force (BSF) ki la rung jubor bad leh tohmet ïa ki dkhot ka longïing jong ka Kong Martina Pohshna bad u Bah Shanroi Lyngdoh kiba dei ki nongshong shnong ka Kuliang, Elaka Narpuh, ka FKJGP, East Jaiñtia Hills ka phah ka khubor pynrem jur ïa ki BSF kiba ka kamram jong ki ka long ban peit ïa ka shong suk shong saiñ pynban ka la mih ka huri-hura man la ka por bad ki nongshong shnong jong kane ka thaiñ.
U President bad General Secretary ka Seng, u Bah Deihok Sumer bad Bah Emlang Sutnga ki la kynnoh ba ka jingshoh jingdat ïa u kpa katei ka longïing khamtam ka jingshah ktah kti ka khun (khynnah) kynthei ba dang 15 snem lem bad ka kmie ka long ka bym lah ban pdiang bad dei ban pynshitom katkum ka aiñ hok longbriew manbriew ïa ki BSF ba donkti.
Ha kawei pat ka liang, ha ka jingïadei bad ka jingshimkhia ki pulit ka Umkiang Patrol Police Out Post ban kem ïa ki BSF ba donkti ha katei ka ka kam, ka Seng ka ai ka jingïaroh bad ban jur ïa u Giri Prasad, IPS kum u Superintendent of Police (SP) jong ka distrik ban shimkhia ïa kane ka jingjia khnang ba katei ka longïing kan ïoh ka jingbishar ba hok bad kumjuh ban ai ka jingïada ïa katei ka longïing na ka jingshah thombor jong ki BSF kumjuh ban pyntikna ba ka aiñ ka dei ban leh salonsar la kiba don ha ki bor jong ka aiñ khnang ba kum kine ki jingjia kin ym jia shuh nangne shakhmat, pynkut ka kyrwoh na ka Seng.
