Nongstoiñ, Jylliew 21
U Myntri Rangbah ka Sorkar Jylla, u Conrad K. Sangma ha ka 21 tarik u Jylliew u ïoh ban plie paidbah ïa ka ïingmala bathymmai jong ka Mallangkona Police Out Post ïa kaba la tei ha kawei na ki jaka ha Mallangkona, Mawshynrut Civil Sub-Division .
Ïa katei ka ïingmala bathymmai la tei bad shna thymmai lyngba ka skhim Police Infrastructure Renovation Fund (PIRF), ha ka jinglut kaba T.17.50 lak, hadien katto-katne snem la shu pyndonkam tang da ka ïing-wai.
Katei ka ‘Out Post’ ka shakri bad khmih ïa ki 19 tylli ki shnong ha ka thaiñ Mallangkona bad kumba 29 hajar ngut ki nongshong shnong bad ha ka jingtei ïa katei ka ïingmala, na ka liang ki paidbah nongshong shnong katei ka thaiñ ki la don don bynta ban noh synñiang la ka long ha ka bor met, ki tiar ki tar bad kiwei-kiwei.
U Sangma haba kren kum u kongsan ha katei ka sngi u la pynpaw da kaba ong ba naduh u Myntri Rangbah, u Symbud Myntri Rangbah, ka DGP jong ka Jylla bad ki ophisar Sorkar ki ïadon ha kane ka jingïalang ban plie ïa kane ka ‘Out Post’ kaba rit eh, hynrei u kwah ban ïathuh sha baroh ba wat la ka long kaba rit ha ka jingtei hynrei kan long pat ka khubor kaba ïar namar kane ka ‘Outpost’ kan dei ka dak jong jingshngaiñ ïa ki paibah nongshong shnong jong ka thaiñ Malangkona baroh kawei.
“Kum ka Sorkar, ka thong kaba hakhmat bad kaba kongsan eh ka long ka shongsuk shongsaiñ jong ki paidbah nongshong shnong ka Jylla,” la ong u Myntri Rangbah da kaba bynrap ruh da kaba ong ba “Hooid kum ka Sorkar ka ïakynduh shibun ki jingeh bad ki diengpyngkiang hynrei lada baroh ki ai ka jingïatreilang met ba mynsiem na ka bynta ban pynurlong ïa ki jingthmu bad jingangnud yn ym don kaei ka ban ym lah ban pynurlong bad kata ka dei ka khubor na ka Sorkar.”
U Bah Prestone Tynsong Symbud Myntri Rangbah ka Sorkar Jylla pat u la pynpaw ba hapoh ka jingïalam jong u Myntri Rangbah kumba katto-katne tylli ki ‘Police Station’ bad ‘Police Outpost’ la lah ban plie ha ki snem ba la dep bad ym tang ban shu plie tang ka nam bad ka kyrteng hynrei ka Sorkar ka pyntikna ba ki jingtei bad ki jaka kin long kiba biang ha ryngkat ki nongtrei ban shakri ïa ki paidbah.
U Bah Prestone u la ong ruh ba kum ka Sorkar ka don ïa ka jingthmu ban ïakhun katba lah ban ym ieh sahdien ïano-ïano ruh ha kaba ïadei bad ka roi ka par bad kum u Symbud Myntri Rangbah uba peit ia ka kam pohïing u kular ha ki nongshong shnong kiba sah ha khappud bad ka Jylla Assam ba kin shongsuk shong saiñ bad kin pyntikna ba kin im suk im sain bad im laitluid.
Ha katei ka sngi hadien ka jingplie ïa katei ka ïingmala, na ka liang u Myntri Rangbah ryngkat u Symbud Myntri Rangbah lem bad ki heh pulit ka Jylla ki la ïashim bynta ruh ban thung dieng ha phyllaw jong katei ka ïingmala kaba thymmai.
