Shillong, Jylliew 21
U Myntri ka tnad Jngohkai Pyrthei jong ka Sorkar Jylla uba dei u MLA ka UDP na West Shillong Constituency, Bah Paul Lyngdoh, u la pynkynmaw ba hadien ki phareng ki la mih na ri India ha u snem 1947, ki nongsynshar ka ri Khasi ki la shong pyrkhat ban don ha India ne East Pakistan kaba mynta ki khot ka Bangladesh hynrei ha kaba khatduh ki la rai ban don ha India.
Ïa kine ki kyntien, u Bah Paul u la pynkynmaw haba ai jingkren kum u kongsan hadien ba u la plie pyrda ïa ka Nurthlong Park kaba don ha Thangkarang kaba hap ha Mawsmai Nongthymmai Elaka kaba hap ruh ha Shella Constituency, East Khasi Hills District kaba la long ha ka Sngi Thohdieng.
Ha kane ka sngi la ïadonlang u MLA ka Shella Constituency u Bah Balajied Synrem, Bah Titosstarwell Chyne kum MDC ka Sohra constituency, u Sirdar ka Mawsmai Nongthymmai Elaka u Bah Kenesing Khongwar, ki nongïalam shnong, ki ophisar ka tnad jngohkai pyrthei, ki longkmie longkpa bad la pynshngaiñ ïa ka jingïalang da ka jingrwai ki samla na katei ka Elaka.
Haba ai jingkren kum u kongsan, u Bah Paul u la ong ba aïu kan jia lada ka ri Khasi kan hap lang sha Bangladesh, hynrei da ka jingïalam bastad uba najrong ka Bangladesh ka la ïoh la ka jong na ka jingsynshar ka Pakistan.
“Nga kynmaw haba u don uwei u pulit S.I. u wan ban pan jingïarap ban pynkynrïah kam na Sohra sha Shillong hangta nga la ïathuhkhana ïa u Thomas Jones bad ka lok ki wan na Wales ki ïaid lyngba ka Bay of Bengal ban poi sha Sohra khlem sngewthuh ïa ka ktien ka thylliej hynrei balei ngi pat ngi kwah ban sah ha Shillong” u la ong.
U la pynkynmaw ha ka por ba ka wan ka MCCL, la wan khot na ïing ïa i mei, hynrei ha kane ka juk mynta haba la khang ïa ka MCCL hynrei ki briew ka thaiñ Sohra ki khlem ïap thngan namar ka don sa kawei ka kam ban trei kata ka kam jngohkai pyrthei.
Shuh shuh u la ong ba ka sorkar MDA ka buh ïa ka thong ba hapoh san snem ki briew kane ka thaiñ kin im jakpoh palat 90 percent da ka jingwan ki nongjngohkai pyrthei.
Ha kajuh ka por u la pyntip ba hapoh ka private public partnership, ka sorkar ka la dep shna ïa ka Detail Project Report ban pan pisa sha ka Sorkar India ban pynitynnad ïa ki jaka jngohkai pyrthei ha Sohra kaba la mang haduh 210 klur tyngka.
