Shillong, Jylliew 21
Ka Dorbar Shnong Mawryngkneng ha ka 21 tarik u Jylliew ka la pynpaw ïa ka jingpyrshah kaba jur halor ka jingthmu ban wanrah ïa ka khyrdop talasi ha ka surokbah jong ka National Highway kaba don ha Mawryngkneng.
Kane ka jingpyrshah ka la mih hadien ba u nongmihkhmat katei ka thaiñ, u Bah Heavingstone Kharpran u la ai ka jingkyrshan ïa ka jingthmu ban wanrah ïa kane ka khyrdop talasi ha katei ka thaiñ.
Haba kren sha ki lad pathai khubor ha Shillong Press Club, na ka liang u Sordar shnong, Bah Peter J Lawai, u la ong ba ka jingdon jong ki khyrdop talasi ha ki surokbah ka long tang kum ka jingpynthut ïa ka leit ka wan jong ki paidbah khamtam ka jingdheng kali bad ki jingjia aksiden.
“Ngi pyrshah jur ïa kane bad ngi kyrpad ïa u MLA ruh ba kin nym leh ïa kane ka kam namar ka long pyrshah ïa ka rai jong ka Dorbar Shnong”, la ong u Bah Lawai.
Shuh shuh u la ong ruh ba ka jingjyllei jong ki kam sniew ha katei ka thaiñ ka long kaba jur katba ki bor pulit pat ki dang long kiba duna palat. U la ong ruh ba lada buh ïa kane ka khyrdop ha katei ka thaiñ, ki pulit kin nym don por shuh ban peit ïa kiwei-kiwei ki jingsniew. Kumta ka donkam ban pynkhlaiñ ïa ka bor pulit ha katei ka thaiñ ym ban wanrah da ka khyrdop talasi.
“Lada don sa ka khyrdop talasi ka mut ki pulit kiba dei ban ai jingshakri sha ki paidbah kiba donkam ïa ka jingïarap bad ban pynïaid beit ïa ka shongsuk-shongsaiñ ha ki shnong ki thaw, ka mut kiba bun na ki, kin bunkam ha ki khyrdop talasi. Kane kan wanrah ka jingdkoh ha ka rukom treikam hapoh shnong hapoh thaw ha kaba ki pulit kin nym lah shuh ban ai ïa ka jingshakri kaba paka sha ki nongshong shnong”, la bynrap u Bah Lawai
U Bah Lawai u la ong ruh ba na ka liang ki nongshong shnong kin sa leit ban ïakynduh ïa ka DGP jong ka jylla, ka Kong Idashisha Nongrang ban pynsngew halor ka jingpyrshah jong ka shnong ïa ka jingthmu ban wanrah ïa ka khyrdop talasi hapoh ka shnong Mawryngkneng.
U la ong ba lada ka tnad pulit ne u nongmihkhmat ka thaiñ ki leh pyrshah ïa ka jingsngew jong ka shnong, na ka liang ka shnong kim banse ba kin pyrshah ïa ka jingïalam jong ka tnad pulit hapoh ka thanat Mawryngkneng.
U Bah Lawai u la ong ruh ba lada ka tnad pulit ka kwah shishah ban rat dyngkhong ïa ki kam sniew hapoh ki shnong, ki dei ban buh noh ïa uwei u ophisar bad ki nongtrei ba kin khmih beit thik tang ïa ka jingdon jong ki nongkhaïi bad ki nongdih drok hapoh ka shnong namar kumba ka long mynta ujuh u pulit ophisar u peit lut ïa baroh ki kam hapoh ka shnong ka thaw.
U la ong ruh ba ki bor pulit kynthei ki dang duna palat hapoh ka shnong Mawryngkneng bad ka long kaba jynjar bha haduh katta-katta, kumta ka la donkam palat ban pynkhlaiñ shuh-shuh ïa ki bor pulit kynthei khnang ba kan wanrah jingsuk haba don kano-kano jingïakajia kaba ïatyngkhuh bad ki kynthei.
