Shillong, Jylliew 21
Ki bor pynïaid ka Meghalaya Energy Corporation Limited (MeECL) ki la sdang ban khmih ïa ki jingdonkam kumba la pynsngew da ka Association of Power Engineer (APE) khamtam ka jingdawa ban sdang ka jingthungkam hapoh shibnai ha ki kyrdan bapher bapher hapoh ka Corporation.
U CMD ka MeECL u Sanjay Goyal uba dei peit ruh ïa ka tnat bording u la ong ba ki bor pynïaid ki la dep ïohpdiang ïa ki jingpynsngew kiba la buh da ka APE bad ka jinglum jingtip bad jingpynkhreh ka la nang ïaid khamtam ban shai katno ka jingdonkam briew ban thung.
U la ong ba ym dei tang ka jingthungkam hynrei ka don ruh ka bynta kaba hap peit ha kaba ïadei bad ka jingkyntiew kyrdan ïa ki karikor (engineer) bad kiwei kiwei ki jingdonkam.
Lah ban pynkynmaw ba dang shen, ka kynhun ki karikor jong ka MeECL kiba don hapoh ka synjuk jong ka Association of Power Engineers (APE) ka la rai ban kyrpad ïa ki bor bahalor jong ka Corporation ban sdang noh hapoh shibnai ïa ka jingthungkam ha ki kyrdan bapher bapher khnang ba ka rukom treikam kan kham biang bad kan ïarap ban pynduna ïa ka jingkhia jong ka kam haba ai jingshakri namar ka jingduna ki nongtrei.
Ka APE ka la ong ba ka jingai jingshakri ki nongtrei ka MeECL ka long kaba khia khamtam haba jia ki jinglynshop mariang ha kaba ki mih ki jingdonkam ban pyndep kham kloi ïa ki kam maramot kiba ïadei bad ka jingsam bording ilektrik sha ki shnong ki thaw.
Kumta u la ong ba haba duna ki nongtrei ka kam ka khia bad ki nongtrei kiba don ki hap ban trei palat pud tang ban pynbiang ïa ka jingsam bording ha kaba kiba bun ki nongtrei ki dei kiba shu thung kontrak namar khlem don shuh ka jingkhot thungkam la katto katne snem.
La ong ba ym duna ïa ka 1000 tylli ki kam kiba lait ha ki kyrdan bapher bapher kiba donkam ban thung namar haduh mynta ki don kumba 1600 bad 1700 ngut ki nongtrei kiba shu thung kontrak.
Kawei pat ka mat kaba la pynsngew da ka APE ka dei ka jingsiew tulop katkum ki kyndon treikam u snem 1996 ha kaba ki Junior Engineer kiba dei ha ka kyrdan Class II, ka tulop kaba ki ïoh ka dei ha ka kyrdan Class III, bad kin sa ïoh ïa ka tulop ha ka kyrdan class II tang hadien san snem ba ki la trei.
Ka APE ka ai jingkyrshan ruh ïa ki bor pynïaid ka MeECL ban shim ki lad ki lynti kiba ïarap ban pynbha bad nang kyntiew ïa ka MeECL lyngba ki rukom treikam kiba pynmyntoi kynthup ruh ki sienjam kiba tyngeh ban ïoh lum ïa ka pisa kaba dei jong ka MeECL kum ka jingsahteng ka pisa bai thang ding ilektrik.
