Shillong, Jylliew 21
Ka Meghalaya & Greater Shillong Progressive Hawkers and Street Vendors Association (MGSPHSVA) ha ka Sngi Thohdieng ka la ther tyngeh ïa u Myntri ka Sorkar Jylla, Bah Paul Lyngdoh bad kam ba um dei satia u dkhot jong ka Town Vending Committee (TVC).
“Ki dkhot jong ngi ki don kiba dei dkhot ha ka TVC. U Bah Paul um dei hi ruh u dkhot ka TVC bad kumno na ka por sha ka por u kren bad dait beit ïa ki nongdie madan,” la ong u nongïalam ka MGSPHSVA, Bah Shane Thabah haba kren sha ki lad pathai khubor.
U Bah Thabah u la ong ïa katei kum ka jingpynphai ktien ïa ka jingkren u Myntri kaba la mih ha ki lad pathai khubor ban pynkynriah noh ïa ki nongdie madan da kaba kam ruh ba u la dep ïakren bad 200 ngut ki nongdie madan ha Khyndai Lad haba ïadei bad kane ka bynta.
“U lamler, u thok, u shukor, u ong ba la dep kren bad kita ki 200 ngut ki nongdie madan…mynno u la ju kren. Mynta ka Sorkar ka la mynjur ban pyntreikam ïa ka aiñ ha ka Jylla, ka TVC ruh la dep thaw bad mynta ka kam ka dang ïaid shaid-shaid ban ïakren bad ïamir jingmut halor kumno ban pynbeit ïa ki nongdie madan, hynrei u Bah Paul um don shuh da kawei-kawei ka kam ne mat ban ïakren,” u la ong.
U la kynthoh ruh ba haba phai sha sor Shillong bad ha Jylla baroh kawei, lada sahkut ka nala, dheng kali, jingeh ha ka ïoh ka kot, pule-puthi, koit ka khiah, ym ju don satia ba kren ne ïohi, hynrei la shu ïohi beit tang ïa ki nongdie madan.
“Nga tharai ba lada ym don ki nongdie madan, ym don mat eiei shuh ban ïakren,” la ong u Bah Thabah.
U la ong ruh ba ka jingkren u Bah Paul ka long tang ban pynkulmar jingmut ïa u paidbah bad u ïohi tang ïa ka Khyndai-Lad ban ïoh shna ïa kiei-kiei.
“Ngin ym pdiang ïa kane ka jingong u Bah Paul namar um dei u Myntri ka tnad kam pynroi sor bad um don bynta hi ruh ne dei u dkhot jong ka TVC. Ai ba un dang pynkulmar jingmut ïa u paidbah hynrei ka Sorkar mynta namarba ka la don ïa ka TVC, kam dei ban ai lad ïa kum une u jait briew ba un pynkulmar jingmut ïa ki paidbah,” la ong utei u nongïalam.
U la ban jur ba dei ban ai lad beit ha ka TVC naba dei ma ka, ka ban kren halor ka jaka ban shong ki nongdie madan, jingai laisen, jingpynkynriah ne ban ym pynkynriah ïa ki nongdie madan bad ym dei satia u Bah Paul.
“Na kyrpad ba un ym pynkulmar jingmut shuh ïa u paidbah namar kim nang shuh ban kamai ne leit bylla…ki kam shukor suda, um pat ju ïakren ne ïakynduh mynno-mynno bad ki nongdie madan,” u la ong.
U la bynrap ba ka TVC kan ïai bteng ban shong ïa ki jingïalang kat bym pat lah pynbeit ïa ka kam ki nongdie madan. Haba kren shai ba ki nongdie madan kim treh satia lada pynkynriah jngai na ki jaka ïew, u Bah Thabah u la ong ba ka seng ka sngewthuh ïa ka jingkhapngiah ka sor, bad naba ki dkhot ki nongdie madan ki long ruh ki dkhot ha ka TVC, kin sa ïa pyrkhat lang namarba ki nongdie madan ki tip kham bha halor ka jinglong-jingman.
Shuh shuh u la ong, “U Bah Paul u dei u Myntri ka tnad kam jngoh kai – uba dei hok, u dei u Myntri ka tnad kam pynroi sor, bad ban ïakynduh ïa u (Paul) ruh ym don eiei ban ïakren naba um don bynta eiei haba ïadei bad ka kam ki nongdie madan.” “Lada um tip aiñ, ngi kloi ban ïakynduh ban pynshai ha ryngkat ki kot ki sla,” u la ong.
